УИХ-ын гишүүн Д.Ганбат мэдээлэл хийлээ.
Тэрбээр "Залуучууд 30 хэмийн хүйтэнд зүй ёсны шаардлага тавиад 13 хонолоо. Нүүрсний хулгайчдыг зарласантай холбогдуулаад товчхон хэдэн үг хэлье. Энэ бол зөвхөн нүүрсний хулгайн асуудал биш. Өнгөрсөн арван жилд манай улсын иргэд өөрийнхөө амьдрал, ирээдүй, боломжийг хулгайлуулсан. Тийм ч учраас зүй ёсны шаардлага тавьж, жагсаж байна.
Засаг, төрийг итгэл найдварын гарцаар харж байна. Монгол Улсын хууль, хяналтын байгууллагад би итгэж байгаа. Энэ байгууллагууд ажлаа хийх ёстой. Гэвч энэ хүмүүсийн ажлыг хийлгэхгүй захиалга өгдөг, дарга даамал, удирдлагаар нь ярьж хэлүүлдэг нөхөд бий. Энэ бол улстөрчид.
Нийт 17 хүний нэр зарласан, үүнд би зөв, бурууг ярихгүй. Цаашид жинхэнэ хулгайчдыг зарлах байх гэж бодож байна. Дээрээсээ эхлэх ёстой. Бууж ирээд л шалгуул. Ардчилсан оронд ийм л байдаг. Жүжиг найруулаад л, салбадай тоглуулаад л эвтэйхэн аргалаад л байдаг явдал дууссан шүү дээ. Гэхдээ ард түмэн бас хариуцлагатай байх ёстой. УИХ-ыг дөрвөн жилийн хугацаанд шахаж шаардаж ажиллах ёстой" гэв.