УИХ-ын гишүүдийг халдашгүй байдлын ард халхавчлуулж үлдэх боломжгүй болгосон бол авлига, албан тушаалын хэрэгт холбогдсон албан хаагчдыг төрийн албанд бүх насаар нь дахин ажиллуулахгүй байхыг Эрүүгийн хуулийн нэмэлт өөрчлөлтөд тусгалаа.
Өнөөдрийн Засгийн газрын хуралдаанаар Эрүүгийн хууль болон Эрүүгийн хэрэг хянан шийдвэрлэх тухай хуульд нэмэлт, өөрчлөлт оруулах асуудлыг хэлэлцсэн. Хуулийн төсөлд туссан гол заалтуудыг Хууль зүй, дотоод хэргийн яамны Төрийн нарийн бичгийн дарга П.Сайнзориг танилцууллаа.
Эрх мэдлээ урвуулан ашиглах, хахуул авсан гэмт хэрэг дээр эрх хасах ялыг 20 жилээр оногдуулах, удирдах албан тушаалд бүх насаар нь ажиллуулахгүй байх зохицуулалтыг хуулийн төсөлд мөн тусгасан байна.
Эрүүгийн хуульд нэмэлт өөрчлөлт оруулж байгаатай холбоотой Авлигын эсрэг хуульд ч нэмэлт өөрчлөлт оруулахаар болжээ.
Уг хуулийн нэмэлт өөрчлөлтөөр, ХАСХОМ-ыг УИХ-ын Ёс зүйн дэд хороо шалгадаг байсныг Авлигатай тэмцэх газар шалгахаар өөрчилсөн байна.
