АТГ-аас өчигдөр нүүрсний хулгайтай шууд болон шууд бусаар холбогдсон нь тогтоогдсон хэмээн УИХ-д МАН-аас сонгогдсон гишүүн Б.Баттөмөр, Н.Наранбаатар, Ш.Раднаасэд, Ц.Анандбазар, Ц.Сэргэлэн нарыг нэрлэсэн.
Дээрх таван гишүүн өчигдөр нүүрсний хулгайн хэрэгтэй ямар нэгэн байдлаар холбогдоогүй гэх тайлбарыг хийсэн бол өнөөдөр АТГ-аас энэ тухайд тодруулж, бүрэн эрхээсээ түдгэлзэн шалгуулахад бэлэн байна гэх мэдэгдэл хийв.
УИХ-ын гишүүн Ц.Анандбазар “ Ард түмэн ядуу байхад ийм том хулгай гэж байж болохгүй. Бид тав ард түмэнтэйгээ нэгдэн нүүрсний хулгайчдыг бүгдийг нь илрүүлнэ. Нүүрсний хулгайн мөнгийг хурааж авч, ядарсан ард түмнийхээ ипотекийн зээлийг төлүүлнэ. Ийм хуулийн төсөл өргөн барина гэж бодож байна. Огт хамаагүй гишүүдийг яаж олж авсан юм гэмээр их сонин баримт дэлгэсэн. Бид тавд нүүрстэй холбогдох ямар ч гарц байхгүй. Би долдугаар ангиасаа хойш нүүрс гэж мэдэхгүй гэж хэлснийг зарим хүн элэг доог болгож байна билээ. Бүлэг дотроо нүүрсний хулгайг илрүүлэх бүлэх байгуулна гэж бодож байна. Би бүлэг дээр нэлээн шүүмжлэлтэй ханддаг. Тэгээд л Сүнээ энэ тэр гээд хүмүүстэй холбодог. Учир утгагүй юм ярьсан шүү дээ. Энэ чинь цаанаасаа захиалгатай юм явж байна. Харин унтаж байгаа баавгайг сэрээсэн тэр хулгайч нар өөрсдөө гомдох цаг нь ирнэ. Нүүрсний хулгайтай тэмцэх ажлын хэсгийн байгуулагдсан цагаас л иймэрхүү юм явлаа. Энэ ажлын хэсэг сайн ажиллаж байж, үр дүн гарна. Гэтэл сенсаацийг сенсаациар дарах арга хэрэглээд байна. УИХ-аас хамгийн цэвэрхэн байж болох таван гишүүнийг яаж сохлов гэдгийг би гайхаж байна. Энэ бол зориулалттай тавьж байгаа жүжиг. Магадгүй УИХ-ын сонгууль эхэлсэн байх. Булганд Сарангэрэл сайд, Обуна нарыг дэвшинэ гэх сургаар намнасан. Их хүчтэй хүн байх шиг байна" гэж байр сууриа илэрхийлэв.