Инфляцын түвшин хэдийнээ оргил цэгтээ хүрсэн ч 2023 онд цар тахлын өмнөх түвшиндээ хүрч буурахгүй гэж “Mastercard” эдийн засгийн хүрээлэнгийн Ази-Номхон далай, Ойрхи Дорнод, Африкийн асуудал эрхэлсэн ахлах эдийн засагч Дэвид Мэнн хэлжээ.
“Инфляц энэ онд оргил цэгтээ хүрсэн хэдий ч ирэх онд цар тахлын өмнөх түвшнээс өндөр хэвээр байх төлөвтэй байна” гэж тэрбээр “CNBC” телевизэд ярилцлага өгөх үеэрээ хэлсэн байна. Түүний ярьснаар, инфляц 2019 оны түвшиндээ эргэн очиход хэдэн жилийн хугацаа шаардагдана.
Дэлхийн улс орнуудын төв банкууд энэ онд өндөр түвшинд хүрсэн инфляцыг бууруулахын тулд бодлогын хүүгээ ихээхэн өсгөсөн юм. Тухайлбал, АНУ-ын Холбооны нөөцийн сан энэ он гарсаар бодлогын хүүгээ 375 суурь нэгжээр өсгөөд байгаа бөгөөд энэ долоо хоногт ээлжит хурлаа хийнэ.
“Огцом нэмэгдэж, өндөр түвшинд хэвээр байгаа инфляц маш том сорилт болоод байна” гэж Д.Мэнн хэлсэн ч төв банкууд хүүгээ шаардлагатай түвшнээсээ илүү өсгөх нь эрсдэлтэй гэдгийг мөн анхааруулсан байна.
