Нийслэлийн Онцгой байдлын газарт өнгөрсөн хоногийн хугацаанд цасанд суусан 5 дуудлага мэдээлэл бүртгэгдэж, Налайх, Багануур, Багахангай дүүргийн Онцгой байдлын хэлтсийн алба хаагчид шуурхай үүрэг гүйцэтгэн, нийт 8 хүүхэд, 60 том хүнийг осгох, хөлдөх аюулаас авран хамгаалж, 10 автомашиныг цаснаас татан гаргалаа.
Тухайлбал
- Багануур дүүргийн 2-р хороо Нарийны ам хэмээх газарт их хэмжээний цас орж халтиргаа гулгаа үүссэн нөхцөл байдалтай, Портер болон Приус-30 маркын авто машинуудын шатахуун дууссан, цасанд суусан, нялх хүүхэдтэй явж байна гэсэн дуудлагыг 17:50 цагт ирүүлснээр Багануур дүүргийн Онцгой байдлын хэлтсийн бүрэлдэхүүн хүрэлцэн очиход 22-48 насны 3 том хүн, 0-13 насны 5 хүүхэд осголтын байдалтай байсныг аюулгүй газар руу шуурхай тээвэрлэн хүргэсэн.
- Багахангай дүүргийн 1-р хороонд автомашин цасанд суусан гэх дуудлагыг 21:29 цагт ирүүлснээр дүүргийн Онцгой байдлын хэлтсийн Гал түймэр унтраах, аврах 80 дугаар ангийн бүрэлдэхүүн очиход “Nissan Muso" загварын автомашин цасанд суусан байдалтай 20-36 насны 3 иргэн, 1 настай хүүхэд байсныг автомашиныг татан гаргаж аюулгүй байдлыг хангасан.
- Төв аймаг Эрдэнэ сум мэргэн Таньюкийн хөшөөнөөс урагшаа зэвсгийн агуулахаас урд зүгт 1.2 км-т “Toyota aqua” загварын авто машин цасанд суусан, нялх хүүхэдтэй явж байна гэсэн дуудлагыг 21:40 цагт ирүүлснээр Налайх дүүргийн Онцгой байдлын хэлтсийн бүрэлдэхүүнийг очиход 2 хүүхэд, 3 том хүн осголтын байдалтай байсныг аюулгүй байдлыг ханган Налайх дүүрэг рүү зөөвөрлөсөн.
- Төв аймгийн Мөнгөнморьт сумаас Багануур дүүрэг явах замд Муса пикап маркын автомашин асахгүй унтарсан, цасанд боогдсон байна гэсэн дуудлагыг 22:00 цагт ирүүлснээр дүүргийн Онцгой байдлын хэлтсийн Гал түймэр унтраах, аврах 64 дүгээр ангийн бүрэлдэхүүнийг очиход дуудлага өгсөн иргэд автомашинаа гаргаж Багануур дүүрэг рүү явсан гэж мэдэгдсэн тул буцсан. Буцах замд Төв аймгийн Мөнгөнморьт сумын 2 иргэн “Бонго-3” загварын автомашинтай цасанд сууж машин нь эвдэрч осголтын байдалтай байсныг Багануур дүүрэгт хүргэсэн.
- Төв аймаг Эрдэнэ сум Өвөр жанчивлангийн харалдаа 2 автобус 100 иргэн цасанд суусан байна гэсэн дуудлагыг 21:05 цагт ирүүлснээр Налайх дүүргийн Онцгой байдлын хэлтсийн бүрэлдэхүүнийг очиход Улаанбаатар хотоос Төв аймаг Эрдэнэ суманд байрлах Өвөр жанчивлангийн сувилалруу явж байсан суудлын автобустай 49 иргэн, Starex, Ниссан патрол, Ланд-200, Rx-350 автомашинууд цасанд суусан байсныг татан гаргаж, 49 иргэнийг тээвэрлэн сувиллын байрлалд хүргэж аюулгүй байдлыг хангаж ажиллалаа гэж нийслэлийн Онцгой байдлын газраас мэдээллээ.