БНХАУ 2023 оны 01-р сарын 09-ний өдрөөс хилээ бүрэн нээж ковидын эсрэг вакцины гурван тунд хамрагдсан гадаадын иргэнийг тусгаарлалтад оруулахгүйгээр хил нэвтрүүлж, 3 хоног эмчийн хяналтад байлгана гэх эх сурвалж нь тодорхойгүй мэдээлэл гараад байгаа. Одоогоор Хятадын эрх баригчид албан ёсоор хилээ нээх тухай мэдэгдэл гаргаагүй боловч 2023 оны эхний улиралд багтаж Хятад улс хилээ нээнэ гэж экспертүүд таамаглаж байна.
Нэгдүгээрт бизнес, эдийн засаг, зах зээлийн мэдээлэлд дүн шинжилгээ хийдэг Блүүмбэрг агентлагаас БНХАУ-ын хилээ нээх төлөвлөгөө бүхий нууц мэдээлэл задарсан тухай саяхан мэдээлсэн. Дэлхийн номер нэг эдийн засагтай орон болох том амбицтай Хятад улсын эдийн засаг “Ковид-19” цар тахлын улмаас төлөвлөсөн төлөвлөгөөндөө хүрч чадахгүй өсөлт нь саарчхаад байгаа. Үүнээс гадна үл хөдлөх хөрөнгийн салбар нь хямралд өртсөн. Тиймээс Хятадын эрх баригчид “Зеро-Ковид” бодлого сулруулж эдийн засгаа сэргээх алхмуудыг 2023 оны 3 дугаар сараас хийхээр төлөвлөж буй гэж таамаглаж байна.
Хоёрдугаарт Хятадын иргэд цар тахлын эсрэг авч хэрэгжүүлж байгаа төр засгийнхаа бодлогыг эсэргүүцэн жагсаж, коммунист намын оновчгүй бодлогыг шүүмжилсэн. Асуудал бүр хурцдаж БНХАУ-ын дарга Ши Жиньпинийг огцрохыг хүртэл шаардсан байдаг. Улмаар олон нийтийн шүүмжлэлийн дараагаас Хятадын эрх баригчид ковидын дэглэмээ сулруулж эхлээд байгаа. Тодруулбал нийслэл Бээжин хот ковидын дэглэмдээ 12-р сарын 06-ны өдрөөс шинэ зохицуулалт оруулж худалдааны төв, супермаркет, цэцэрлэгт хүрээлэн зэрэг олон нийтийн үйлчилгээний газарт ПСР шинжилгээний дүнг шалгахгүй байх тогтоол гаргасан. Мөн баар ресторан, интернэт кафе, караоке, саун зэрэг битүү газарт 48 цагийн дотор хийлгэсэн ПСР шинжилгээтэй нэвтрүүлж байхаар болсон. Өөрөөр хэлбэл худалдаа, үйлчилгээний салбарынханд ажиллах боломжийг олгож эдийн засгаа сэргээх алхмыг алгуур хийж эхлээд байгаа юм.
Гуравдугаарт Хятад улс 2023 оны 01-р сарын 09-ний өдрөөс хилээ бүрэн нээнэ гэсэн мэдээллийг БНХАУ-ын гадаад улсад суралцдаг оюутнууд тараасан гэж зарим эх сурвалжууд мэдээлж байна. Мөн Хятад орныг судалдаг судлаачид БНХАУ ойрын хугацаанд ковидын дэглэмээ сулруулна гэж үзэж байгаа юм.
Г.Жүгдэр
Toim.mn
