Хөрсний доройтлыг бууруулж, экологийн тэнцвэртэй байдлыг хангах үүднээс Монгол Улсын ерөнхийлөгчийн санаачилгаар “Тэрбум мод” үндэсний хөдөлгөөнийг эхлүүлсэн билээ. Энэ хүрээнд Дархан-уул аймгийн хэмжээнд “Ногоон Дархан-2032” хөтөлбөрийг хэрэгжүүлэхээр болсон юм. Үндэсний хөдөлгөөний хүрээнд өрнүүлэх анхны мод тарилт Дархан суманд өчигдөр эхэллээ.
Дархан сумын тавдугаар багийн нутагт 5.7 га газарт 350 гаруй иргэн мод тарьлаа. Дархан хотоо ногоон болгох, мод тарих үндэсний хөдөлгөөнийг “Хаанчлалын Дархан түншлэл” ТББ, “Христэд итгэгч сүм чуулганы холбоо” болон бусад төрийн бус байгууллагууд хамтран эхлүүллээ. Уг мод тарьж буй талбайг дээрх төрийн бус байгууллагууд арван жилийн хугацаанд хариуцсан ойжуулалтыг хийхээр гэрээ байгуулсан ажээ. Энэ өдөр нийт 300 мод тарьж усжуулалтыг хийлээ. Аймгийн хэмжээнд ирэх долоо хоногт тарьц, суулгацын үзэсгэлэн худалдааг зохион байгуулахаар төлөвлөжээ. Эрүүл аюулгүй, тав тухтай орчинд амьдрах, ногоон хот болохын төлөө иргэн бүрийн оролцоо чухал, тиймээс мод тарих үндэсний хөдөлгөөнд нэгдэхийг аймгийн БОАЖГ-ын дарга Г.Батбаяр уриалж байна. Тус аймгийн хэмжээнд арван жилийн хугацаанд хорин сая мод тарихаар болсон билээ.
