АНУ-ын Ерөнхийлөгч Жо Байдены Оростой хэлэлцээ эхлүүлэхийн тулд тавьсан нөхцөлийг Кремль хүлээн зөвшөөрөх боломжгүй гэж тус улсын төрийн тэргүүний хэвлэлийн нарийн бичгийн дарга Дмитрий Песков мэдэгдэв.
Ерөнхийлөгч Байден "Путин Украиныг орхисны дараа л хэлэлцээр хийх боломжтой" гэдгээ хэлсэн. Харин Кремль үүнд бэлэн биш байгаа бөгөөд учир нь цэргийн тусгай ажиллагаа үргэлжилсээр байгааг Песков онцолжээ.
Вашингтон ОХУ-ын хавсаргасан шинэ газар нутгийг хүлээн зөвшөөрөхгүй байгаа нь харилцан ярилцах нийтлэг үндэслэлийг эрэлхийлэхэд ихээхэн хүндрэл учруулж байна гэв. Тэрээр "Бид зорилгодоо хүрэхийн тулд Ерөнхийлөгч Путин хүн бүртэй хэлэлцээ хийхэд нээлттэй байсан, одоо ч нээлттэй хэвээр байгаа" гэж нэмж хэлэв.
"Мэдээжийн хэрэг, бидний ашиг сонирхолд хүрэх хамгийн тохиромжтой арга бол энх тайвны дипломат арга юм" гэж Ерөнхийлөгчийн хэвлэлийн нарийн бичгийн дарга дүгнэв.
Тодруулахад, өмнөх өдөр нь Байден Путинтэй ямар ч холбоо барихаар төлөвлөөгүй ч Оросын удирдагч Украины мөргөлдөөнийг зогсоох " хүсэл сонирхлоо харуулсан" тохиолдолд ийм боломжийг зөвшөөрч байна гэж мэдэгдсэн юм. Үүний зэрэгцээ АНУ НАТО-гийн түншүүдтэй зөвлөлдсөний үндсэн дээр ямар ч холбоо барих боломжтой гэдгийг Америкийн ерөнхийлөгч онцолсон байв.
ОХУ-ын Гадаад хэргийн сайд Сергей Лавров "Орос харилцаа холбоо тогтоохоос зайлсхийхгүй байгаа ч дорвитой санал санаачлагыг хараахан сонсоогүй байна" гэж тэмдэглэжээ.
Эх сурвалж: РИА новости