Их Британи 2023 онд Украинд үзүүлэх цэргийн тусламжаа нэмэгдүүлж магадгүй байна. Энэ мэдэгдлийг Их Британийн Ерөнхий сайд Риши Сунак даваа гарагт хийсэн бөгөөд ням гарагт түүний албанаас гаргасан илтгэлийн ишлэлүүдэд энэ тухай дурдсан байв.
"Бүү эргэлз. Бид Украиныг урт удаан хугацааны турш дэмжсэн хэвээр байх болно. Энэ хүрээнд ирэх жил цэргийн тусламжаа хадгалах эсвэл нэмэгдүүлэх болно. Мөн Украинчуудын тэмцлийг дэмжихийн тулд агаарын довтолгооноос хамгаалах шинэ тусламж, түүнд тулгуурласан чухал дэд бүтцийг нийлүүлэх болно. Украиныг хамгаалснаар бид өөрсдийгөө хамгаалж буй хэрэг юм." гэж Сунак Лондон хотын захирагчийн зохион байгуулсан хүлээн авалт дээр хэлсэн үгэндээ дурджээ.
10-р сарын 25-нд ерөнхий сайд болсон Сунак гадаад бодлогын анхны томоохон илтгэлдээ вант улсын урт хугацааны стратегийг бий болгох шаардлагатайг онцлон тэмдэглэжээ. "Миний удирдлаган дор одоогийн нөхцөл байдалтай эвлэрэхгүй, бид өөрөөр ажиллах болно. Бид эрх чөлөө, нээлттэй байдал, хууль дээдлэх ёс, сорилт бэрхшээлийн энэ мөчид хэзээ ч гуйвшгүй итгэлээрээ хөгжинө. Бидний эрх ашиг хамгаалагдаж, үнэт зүйл маань ялах болно" гэжээ.
"Геополитикийн асар их өөрчлөлт"-ийн хүрээнд тус улсын эрх баригчид өнгөрсөн онд хэвлэгдсэн Нэгдсэн Вант Улсын аюулгүй байдал, батлан хамгаалах, гадаад бодлогын асуудлаарх үзэл баримтлалыг шинэчлэхээр ажиллаж байгааг Британийн засгийн газрын тэргүүний албанаас дурджээ.
Британийн зэвсэг
Арваннэгдүгээр сарын 19-нд Сунак Киевт айлчлах үеэрээ Их Британийн Украинд үзүүлэх цэргийн тусламжийн хэмжээ 3 тэрбум фунт стерлинг буюу 3,6 тэрбум доллараас давсан гэж мэдэгдсэн юм. Тодруулбал, Их Британи Украинд 7000 орчим NLAW танк эсэргүүцэх пуужингийн систем, 100 гаруй хуягт машин, Starstreak пуужингаар тоноглогдсон "Stormer" өөрөө явагч зенитийн буу, хэдэн арван M109 гаубиц, L119 чирэх буу, олон пуужин харвах M270 систем илгээсэн. Түүнчлэн Brimstone өндөр нарийвчлалтай пуужин, их бууны 16 мянга гаруй сум, 4.5 тонн хуванцар тэсрэх төхөөрөмж нийлүүлжээ.
Аравдугаар сарын дундуур Их Британийн засгийн газар АНУ-ын NASAMS зенитийн пуужингийн системд зориулагдсан AIM-120 (Advanced Medium Range Air-to-Air Missile, AMRAAM) дунд тусгалын пуужингуудыг Украинд нийлүүлэх нь тодорхой болсон. Үүнээс гадна Лондон дөрвөн сар тутамд 10 мянган Украины цэргийг гурван долоо хоногийн сургалтад хамруулна гэдгээ амласан. Хамгийн сүүлийн мэдээллээр өнөөг хүртэл Британийн багш нар Украины Зэвсэгт хүчний 7 мянга гаруй цэргийн албан хаагчийг бэлтгэсэн байна.
Мөн Лондон Киевт агаарын довтолгооноос хамгаалахад зориулж 125 зенитийн буу, тусгай техник хэрэгслээр хангана. Дараагийн тусламжийн хүрээнд Украины Зэвсэгт хүчинд 12-р сарын дундуур гэхэд 25 мянган иж бүрдэл өвлийн дүрэмт хувцас, 2000 ширхэг унтлагын иж бүрдэл, хэт хүйтэнд зориулсан 2000 ширхэг унтлагын хувцас, 150 ширхэг халаалттай майхан нийлүүлэхээр төлөвлөж байна.
Эх сурвалж: Итар-ТАСС