Иргэд олон жилийн өмнө машин худалдахдаа нотариатаар батлуулсан ч тээврийн хэрэгслийн бүртгэлийн системд бүртгүүлж, шилжүүлээгүйгээс үүдэн хуучин бүртгэл гарч ирэхийн зэрэгцээ тухайн иргэний нэр дээр татварын өр, замын хөдөлгөөний дүрмийн зөрчлийн торгууль үүсэж байгааг анхаарна уу.
Мөн ашиглалтаас гарсан, бусдад шилжүүлсэн хуучин автомашинууд хаа нэгтээ бусдын хөдөлгөөнд саад учруулж, иргэдийг хэвийн аюулгүй зорчиход нөлөөлж болзошгүй байгаа тул өөрийн өмчлөлд байсан автомашины мэдээллээ эргэн шалгахыг Тээврийн цагдаагийн албанаас зөвлөлөө. Монгол Улсын Зам, тээврийн хөгжлийн сайдын 2020 оны А/222 дугаартай “Автотээврийн хэрэгслийн бүртгэл хөтлөх, улсын дугаар олгох журам”-д заасны дагуу сүүлийн таван жилийн турш техникийн үзлэгт хамрагдаагүй бол иргэний хүсэлтийг үндэслэн хасалт хийнэ гэж заасан.
Мөн иргэн өөрийн эзэмшилд байгаа ашиглах боломжгүй болсон тээврийн хэрэгслийн улсын дугаарыг хураалган бүртгэлээс хасуулах үүрэгтэй байдаг тул Автотээврийн үндэсний төвд хандахыг Тээврийн цагдаагийн албанаас зөвлөлөө.
Түүнчлэн тээврийн хэрэгслийн эзэмшигч нь тодорхой бус, замын зорчих хэсэгт болон нийтийн эзэмшлийн гудамж талбайд удаан хугацаанд байсан тээврийн хэрэгслийн мэдээллийг Тээврийн цагдаагийн албаны ерөнхий эргүүлийн 93020111 дугаарын утсаар авч байна.
Тээврийн цагдаагийн албанаас өчигдөр өгсөн мэдээллээр иргэдээс 564 мэдээлэл хүлээн авч нутаг дэвсгэр хариуцсан цагдаагийн байгууллагын Замын цагдаагийн хэлтэс, тасгуудад хүргүүлж эзэн холбогдогчийг тодорхойлж замын хөдөлгөөний дүрэмд заасан түр буюу удаан зогсох журам зөрчиж бусдын хөдөлгөөнд саад болсон эсэх, иргэдийн автомашин түр зогсох боломжийг хязгаарлаж байгаа асуудлыг танилцуулан чөлөөлөх, улсын бүртгэлийн дугааргүй, эзэн холбогдогч нь тодорхойгүй тээврийн хэрэгслүүдийг зөөж, шилжүүлж гудамж, талбайг чөлөөлөх арга хэмжээг үе шаттай явуулж байна.
Нийтийн эзэмшлийн гудамж талбайд удаан хугацаагаар байршуулсан тээврийн хэрэгслийн улмаас бусад хөдөлгөөнд оролцогч тухайн зогсоолд зогсох боломжийг хааж байгаа нь гудамж замын түгжрэлд нөлөөлж, хөдөлгөөний ачааллыг нэмэгдүүлэх, стресс үүсгэх, уур бухимдал төрүүлэх, хөдөлгөөний эрчмийг багасгахад нөлөөлж байгаа нь дээрх автомашинуудын тоон мэдээллээс харагдаж байгаа аж.
