Канадын засгийн газар хүн амын хөгшрөлт, тэтгэврийн насныхан олон болж байгаатай холбоотойгоор тус улс эдийн засаг дахь ажиллах хүчний хомсдолыг гадаадын цагаачдаар нөхнө гэж найдаж байна. Гэсэн хэдий ч Канадууд ийм олон тооны гадаадын иргэдийг сэтгэл нийлэн хүлээж авахад бэлэн биш байна.
Энэ 11-р сарын эхээр Канадын холбооны эрх баригчид цагаачлалын талаархи томоохон төлөвлөгөөгөө зарлав. Үүнд ирэх оны 1-р сараас 2025 оны эцэс хүртэл тус улсын засгийн газар жил бүр 500,000 цагаач хүлээн авахаар төлөвлөж байна. Энэ нь ойрын гурван жилд Канадын хүн ам нийт 1.5 сая хүнээр нэмэгдэнэ гэсэн үг.
Нэг хүнд ногдох тооцоогоор авч үзвэл энэ нь Нэгдсэн Вант Улсын авахаар төлөвлөж буй хэмжээнээс найм дахин, АНУ-ын засаг захиргааны төлөвлөж буй хэмжээнээс дөрөв дахин их юм.
Гэсэн хэдий ч Канадын эрх баригчдын төлөвлөгөө нь тус улсын оршин суугчдын сэтгэл санааг бүрэн илэрхийлэхгүй байна. Тэдний ихэнх нь гадаадын иргэд ийм олноор шилжин ирэхээс эмээж байна.
Хэдэн арван жилийн турш Канад улс хүн ам, эдийн засгаа өсгөхийн тулд шинэ оршин суугчдын шилжилт хөдөлгөөнийг зориудаар дэмжсээр ирсэн. Гэхдээ цагаачдад Канадад байнгын оршин суух зөвшөөрөл олгодог боловч энэ нь харин иргэншил биш юм.
Өнгөрсөн онд Канадад 405 мянган хүн оршин суух зөвшөөрөл авсан нь тус улсын түүхэн дэх хамгийн өндөр үзүүлэлт болжээ.
Канадын төрөлт тогтмол буурч байгаа бол иргэдийн дундаж нас харин ч эсрэгээрээ нэмэгдэж байгаа нь Канадыг тэтгэвэр авагчдын орон болгох аюул заналхийлж байгаа бөгөөд энэ нь хөдөлмөрийн насныханд улам бүр хэцүү болж байна.
Товчхондоо тус улс эдийн засгаа өсгөж, хөгжүүлье гэвэл цагаачидгүйгээр хийж чадахгүй гэсэн үг. Канадын ажиллах хүчний өсөлт нь аль хэдийнээс цагаачлалаас хамааралтай юм.Канадад түүхэндээ цагаачлалын нийгэм дэх дэмжлэг үргэлж өндөр байсаар ирсэн.
Өнөөдөр Канад улсын бараг дөрвөн хүн тутмын нэг нь өөр улсаас гаралтай бол G7-ийн бусад бүх улсад энэ үзүүлэлт доогуур байна. Тухайлбал, АНУ-ын хүн амын дөнгөж 14 хувийг цагаачид бүрдүүлдэг.
Канад газар нутгийн хэмжээгээр Оросын дараа хоёрдугаарт ордог бөгөөд тэнд "ердөө" 38 сая хүн амьдардаг. Өөрөөр хэлбэл, хүн амын өсөх орон зай хангалттай бий.
Канад улс бусад орнуудтай харьцуулахад эдийн засгийн ангиллаас илүү олон цагаач хүлээн авдаг төдийгүй дүрвэгсдэд хамгийн нээлттэй улсуудын нэг юм. 2021 онд тус улсын эрх баригчид 20 мянга гаруй цагаачдад орогнох эрх олгосон байна. Энэ онд гэхэд Украины 300 гаруй дүрвэгсдийг хүлээж аваад байна.
Гэсэн хэдий ч Канад улс цагаачлалын амбицтай төлөвлөгөөгөө хэрэгжүүлж чаддаггүй. Тухайлбал, 2021 онд засгийн газар 59 мянга орчим дүрвэгчийг хүлээж авах гэж байсан ч бодит байдал дээр гурав дахин бага дүрвэгсэд иржээ.
Эх сурвалж: ВВС