Арабын нэгдсэн Эмират улсын Фужайрах хотод 45 дахь удаагийн Шатрын бодлого бодолтын пэлхийн аварга шалгаруулах тэмцээн арваннэгдүгээр сарын 13-19-ний өдрүүдэд амжилттай болж өндөрлөлөө. Тус тэмцээнд Монгол Улсыг төлөөлөн оролцсон "Алдар" спорт хороо,"Элит брейн" академийн тамирчин Шатрын их мастер, Бодлого бодолтын дэлхийн шатрын холбооны мастер С.Билгүүн түүхэн амжилт гаргалаа.
Дэлхийн 30 орны шилдэг 82 бодогч нийт 18 даалгаврыг зургаан үед бодож өрсөлдсөн бөгөөд энэ удаагийн тэмцээнд Шатрын их мастер С.Билгүүн боломжит 90 оноос 77.75 оноотой шагналт IV байр эзэлж бодлого бодолтын их мастер цолны анхны нормоо биелүүллээ.
Дэлхийд шатар тоглолтын болон Бодлого бодолтын төрлөөр давхар их мастер цолтой 10 хүрэхгүй тамирчин байдаг гэдгийг зохион байгуулагчид хэлж онцгой амжилт ойрхон байгааг С.Билгүүнд сануулжээ.
Мөн энэхүү тэмцээнд эх орноо төлөөлөн оролцсон их мастер С.Билгүүний дүү бодлого бодолтын спортын мастер С.Чингүүн 47.5 оноо авч 49-р байрт шалгарсан.
Их мастер С.Билгүүн өмнө нь 2015, 2017, 2021 онуудад бодлого бодолтын дэлхийн аварга шалгаруулах тэмцээнд оролцож байжээ.
