АНУ-ын сансрын агентлаг НАСА Флоридагийн Канаверал хошуунаас хамгийн хүчирхэг SLS (Space Launch System) пуужинг хөөргөлөө. Энэ бол сар руу дахин хүн нисгэх Америкийн шинэ "Артемида" (Artemis) хөтөлбөр юм.
Энэ удаагийн нислэг нь нисгэгчгүй бөгөөд даалгаврын зорилго нь технологоо туршиж, 2024 онд "Артемис-2"-ыг багийн хамт сар руу хөөргөх явдал юм.
Дараагийн удаад энэ 100 метрийн урттай пуужин нь сансрын нисгэгчдийг багтаасан "Орион" капсулыг саранд хүргэх ёстой. Хамгийн сүүлд хүн төрөлхтөн 1972 оны 12-р сард "Аполло-17" хөлгийн нислэгийн үеэр саран дээр газардсан юм.
Ирэх 12-р сард НАСА "Аполло-17" хөлгийн нислэгийн 50 жилийн ойг тэмдэглэнэ. Мөн энэ удаагийн нислэгийг Грекийн домог зүйд гардагчлан "Аполлон"-ы эгчийн нэрээр "Артемида" гэж нэрлэжээ. Одоо ийм урт хугацааны завсарлагааны дараа, цоо шинэ тоног төхөөрөмжөөр сарны шинэ хөтөлбөрийн анхны нислэгийг нисгэгчгүй хийж байна. Энэ бол технологийн үр нөлөөг шалгах туршилт юм.
Түүнчлэн энэ нь Артемида"-г хөөргөх гурав дахь оролдлого юм. Өнгөрөгч 9, 10-р сард хөөргөх ёстой байсан ч техникийн шалтгаанаар хойшлогдож байв. Пуужингийн үндсэн шатны дөрвөн том хөдөлгүүр бүгд нислэгт бүрэн бэлэн болсон гэдэгт инженерүүд итгэлтэй байгаагүй юм.
Харин энэ удаад хөөргөхийг зөвшөөрсөн бөгөөд пуужин орон нутгийн цагаар 01:47 (GMT 06:47) цагт Кеннедигийн сансрын төвөөс хөөрчээ.
Европын сансрын агентлагийн сансрын нислэг хариуцсан захирал Др.Дэвид Паркер "Орионы нислэгийн замыг нарийн тааруулахын тулд хэд хэдэн модулийн чухал маневр хийх болно" гэжээ.
"Орион" хөлөг энэ удаад 26 хоногийн турш сарны тойрог замд байх болно. Ингэснээр 2024 онд 21 хоног үргэлжлэх төлөвтэй байгаа багийн нислэгийн үеийн хөлгийн чадварыг турших боломжтой.
"Орион" хөлөг энэ удаагийнхаа нислэгийн үеэр сарны гадаргуутай хамгийн ойр байх зай нь 100 км, харин хамгийн холдох зай нь 70,000 км юм. Хөлөг 12-р сарын 11-нд эх дэлхийдээ буцаж ирнэ.
Төслийн инженерүүдийн хувьд хөлгийн буух мөчийг хамгийн чухал гэж тодотгож байна. Тэдний хамгийн их санаа зовж буй зүйл бол "Орион"-ы дулааны хамгаалалт нь манай гаригийн агаар мандалд орох үеийн эрс тэс температурыг даван туулж чадах эсэх юм.
Капсул маш хурдан нисэх болно, тухайлбал 38,000 км / цаг хурдтай, энэ нь дууны хурдаас 32 дахин их юм. Доод талын дэлгэц нь 3000 ° C-д орчим температурыг тэсвэрлэх ёстой.
Ирэх арван жилийн хугацаанд саран дээр хүмүүсийг илүү тогтвортой байлгах, саран дээр амьдралын орчныг бүрдүүлэх, сансрын жижиг станцын хамт ровер ашиглах зэрэг хэд хэдэн илүү төвөгтэй даалгавруудыг хийхээр төлөвлөж байна.
Эх сурвалж: ВВС