Ерөнхий сайд Л.Оюун-Эрдэнэ нүүрсний хулгайтай тэмцэнэ гэдгээ зарласан. Ингэхдээ улс төрчдийг нүүрсний хулгайтай холбоотой болохыг нуугаагүй.
Тэгвэл Авлигатай тэмцэх газраас “Тавантолгой-Гашуунсухайт” чиглэлийн төмөр замын бүтээн байгуулалтад орж ажилласан 24 аж ахуйн нэгжийн 33 албан тушаалтныг шалгаж эхэлсэн байна. Тодруулбал, эдгээр албан тушаалтны ажлын газар болон гэрт нь нэгжлэг хийж, гүйцэтгэх ажиллагаа өнгөрсөн шөнө 02:00 цаг хүртэл үргэлжилжээ. Албаны эх сурвалжийн мэдээлснээр эл асуудлаар өнөөдөр Авлигатай тэмцэх газраас мэдээлэл өгөх аж.
Засгийн газар “Эрдэнэс Тавантолгой” ХК-д зургаан сарын хугацаанд онцгой дэглэм тогтоож, бүрэн эрхэт төлөөлөгч томилсон. Мөн тус компанийн зарим холбогдох албан тушаалтныг нүүрсний хулгайтай холбогдсон байж болзошгүй гэж үзэж, ажлаас нь чөлөөлсөн билээ. Товчхондоо, Л.Оюун-Эрдэнийн мэдэгдлээс хойш нүүрсний хулгайн бүлэглэлийнхэн үүрээ эвдүүлсэн шоргоолж шиг үймж байгаа бололтой.
