Украины Ерөнхийлөгчийн Тамгын газар Киевийн орон сууцны нэг байшинд гал гарч байгаа бичлэгийг нийтэлжээ.
Оросын арми Украины эрчим хүчний дэд бүтцэд шинэ том цохилт өглөө. Украины Эрчим хүчний сайд Галущенко үүнийг бүхэл бүтэн дайны явц дахь хамгийн амбицтай гэж тодотгов. Киев хотын дарга Виталий Кличкогийн хэлснээр, Украины нийслэлийн төв хэсэгт байрлах гурван орон сууцны барилга эвдэрсэн, олон иргэд цахилгаангүй үлдсэн гэжээ.
Галущенко “Цэргийн болон олон улсын тавцанд ялагдсаныхаа дараа дайсан өшөө авалтын ээлжит оролдлогоо хийж, өвлийн өмнөхөн манай эрчим хүчний системд хамгийн их хохирол учруулахыг оролдож байна” гэж бичжээ.
Украины Ерөнхийлөгч Владимир Зеленский яаралтай мэдэгдэл хийхдээ ОХУ-ын зэвсэгт хүчин 85 пуужин харвасан бөгөөд дахин цохилт өгч магадгүй гэж мэдэгджээ. Мөн Иранд үйлдвэрлэсэн Оросын "камиказе нисгэгчгүй онгоц"-уудын халдлага улам бүр эрчимжиж болзошгүйг дурдсан байна.
Киевийн Печерский дүүрэгт гурван орон сууцны барилга эвдэрсэн гэж Кличко мэдэгдэв. "Осол гарсан газарт эмч, аврагчид ажиллаж байна. Илүү дэлгэрэнгүй мэдээллийг дараа өгнө" гэж Киев хотын дарга бичжээ.
Аврагчдын мэдээлснээр орон сууцны барилгуудад шууд цохилт өгөөгүй ч унасан пуужингийн хэлтэрхийнүүд оносон байна.
Их хэмжээний пуужингийн довтолгооны улмаас эрчим хүчний "Укренерго" компани орон даяар, тэр дундаа нийслэлд цахилгаан эрчим хүчийг яаралтай хязгаарлаж эхэлсэн. Киевт хэрэглэгчдийн тал орчим хувь нь цахилгаангүй болсон байна. "Энэ хязгаарлалт бол эрчим хүчний системийг тэнцвэржүүлэх, тоног төхөөрөмжийн эвдрэлээс урьдчилан сэргийлэхэд зайлшгүй шаардлагатай алхам" гэж хотын дарга тодотгов. Мөн Украины агаарын довтолгооноос хамгаалах хүчин Киевийн тэнгэрт дөрвөн пуужинг устгасан гэж Киев хотын дарга мэдэгдэв.
Мөн Харьков хотод метро ажиллахгүй байна. Украин дахь интернетийн урсгал өмнөх түвшингийнхээ 67% хүртэл буурсан байна.
Молдавын ерөнхий сайдын орлогч Андрей Спину цахилгаан эрчим хүчний асуудал бас Молдав улсад нөлөөлж эхэлсэн байна. Украины эрчим хүчний сүлжээнд холбогдсон Молдавын эрчим хүчний сүлжээнүүдийн нэг нь автоматаар офлайн болж, Молдав даяар их хэмжээний тасалдал үүсгэв.
Эх сурвалж: ВВС