Засгийн газар “Эрдэнэс тавантолгой” ХК-д зургаан сарын хугацаатай онцгой дэглэм тогтоож, бүрэн эрхт төлөөлөгч томилсон. Бүрэн эрхт төлөөлөгч Ж.Ганбат “Эрдэнэс тавантолгой” ХК-ийн Гүйцэтгэх захирал Б.Ганхуяг болон эрх бүхий дөрвөн албан тушаалтныг ажлаас нь чөлөөлж, тэднийг АТГ-т шалгуулахаар хандаад байгаа. Засгийн газраас “Эрдэнэс тавантолгой” ХК-д явуулж буй энэ ажиллагаа нь үндсэн хоёр зорилготой. Нэгдүгээрт, нүүрсний экспортыг цэгцлэх, ашгийг нь нэмэгдүүлэх замаар ам.доллар татан төвлөрүүлэх. Хоёрдугаарт, “Эрдэнэс тавантолгой” ХК-д эзэн суусан “Нүүрсний бүлэглэл”-ийг зайлуулах давхар зорилго агуулж буй гэх.
Тэгвэл Засгийн газарт ч захирагдахаа больсон, “Эрдэнэс тавантолгой”-д эзэн суусан “Нүүрсний бүлэглэл” гэж чухам хэн гэдэг, ямар хүмүүсийг нэрлэж, цоллоод байгаа юм бэ, гүйцэтгэх захирал асан Б.Ганхуяг тэдэнтэй ямар холбоо сүлбээтэй байв гэдгийг эрэн сурвалжлахаар энэхүү цувралыг эхлүүлж байна.
Эхний дугаартаа, Б.Ганхуягийг гүйцэтгэх захирлаар ажиллаж байх үед “Эрдэнэс тавантолгой” ХК-тай 2.2 их наяд төгрөгийн олборлолтын гэрээ байгуулж, Засгийн газраас “Тавантолгой-Манлай-Ханги” чиглэлийн 501 сая ам.долларын концесс авсан, басхүү “Эрдэнэс тавантолгой” ХК-тай хувийн компаниараа нүүрс тээврийн гэрээ байгуулж байсан Э.Оюутцэцэн гэх залууг танилцуулж байна. Чухамдаа тэр Б.Ганхуягийн үед “Эрдэнэс тавантолгой”-д эзэн мэт аашилж байжээ.
БАРИМТ 1: Э.ОЮУТЦЭЦЭН “ТИ ТИ ЖИ ВИ СИ ӨҮ” ХХК-ИАРАА “ЭРДЭНЭС ТАВАНТОЛГОЙ” ХК-ТАЙ 2.2 ИХ НАЯД ТӨГРӨГИЙН ОЛБОРЛОЛТЫН ГЭРЭЭ БАЙГУУЛЖЭЭ
“Эрдэнэс тавантолгой” ХК өнгөрөгч 2021 оны арваннэгдүгээр сард “Цанхийн зүүн уурхайн гэрээт олборлогч” шалгаруулах 2.2 их наяд төгрөгийн санхүүжилттэй тендер зарлажээ. 2.2 их наяд төгрөг гэдэг бол Монгол Улсын бүтэн жилийн төсвийн 10/1-тэй тэнцэх асар их мөнгө. Ноцтой нь, тендерийн мэдээллийн санд бүртгэгдсэнээр 2.2 их наяд төгрөгийн тус тендер “Ти Ти Жи Ви Си Өү” ХХК дангаараа оролцож, шалгарчээ.
Ингэхдээ 1 м3 уулын цулын ажлыг 10,366 төгрөгөөр буюу нийт 2.229.281.898.600 төгрөгөөр гүйцэтгэх саналаар шалгарсан юм байна. Улмаар 2021 оны арваннэгдүгээр сарын 9-нд “Эрдэнэс тавантолгой” ХК тендерт шалгарсан “Ти Ти Жи Ви Си Өү” ХХК-тай гүйцэтгэлийн 36 сарын гэрээ байгуулж, 2022 оны нэгдүгээр сарын 5-наас олборлолтоо эхлүүлжээ. Гэрээнээс онцлох нэг заалт нь, “Эрдэнэс тавантолгой” ХК 2.2 их наяд төгрөгийн төлбөрөө төгрөгөөр болон нүүрсээр хийхээр тохиролцжээ. Гэрээний эхний нүүрт “Эрдэнэс тавантолгой” ХК-ийг төлөөлж Б.Ганхуяг, “Ти Ти Жи Ви Си Өү” ХХК-ийг төлөөлж Э.Оюутцэцэн гэх нэр дурайж байгааг тодруулж харуулав.
Үргэлжлэлийг ЭНД ДАРЖ уншина уу...
Эх сурвалж: Ergelt.mn
