НҮБ-ын Ерөнхий Ассамблей даваа гаригт ээлжит бус хуралдаанаараа олонхийн саналаар ОХУ-аар Украинд учруулсан хохирлыг барагдуулах механизмыг бий болгох тухай тогтоолын төслийг баталлаа.
Тогтоолын төслийг 94 улс дэмжиж, 13 улс эсрэг санал өгч, Орос, Хятад, Беларусь, Куба зэрэг улсууд санал өгсөн байна. АНЭУ, Серби, Өмнөд Африк, Энэтхэг, Индонези, Израиль, Египет, Бразил, Арм зэрэг 74 улс түдгэлзсэнийн нэг нь Монгол улс байв.
Хэрэв НҮБ-ын тогтоол хэрэгжвэл ОХУ хэдий хэмжээний хохирлыг төлөх вэ. Энэ талаарх эцсийн тооцоолол гараагүй ч урьдчилсан байдлаар хохирлыг тооцчихоод байгаа. Гэхдээ дайн дуусаагүй.
Аравдугаар сард Дэлхийн банк Украинд болж буй дайны хохирлыг 350 тэрбум евро гэж тооцсон. Үүнээс өмнө Украины Ерөнхийлөгч Владимир Зеленский 10-р сарын 10-наас хойш ОХУ-аас Украиныг пуужингаар харвасны улмаас цахилгаан станцуудын 30 хувь нь сүйрсэн гэж мэдэгдээд буй.
Украины сэргээн босголтын хэрэгцээ ойролцоогоор 349 тэрбум доллар буюу тус улсын 2021 оны дотоодын нийт бүтээгдэхүүнээс 1.6 дахин их байх магадлалтай гэсэн тооцоог өнгөрөгч 9-р сард гаргаж байв. Тэр цагаас хойш тус улсын эрчим хүчний салбар томоохон хохирол амсаад байгааг нэмж тооцох хэрэгтэй болж байгаа юм.
Зеленскийн хэлснээр, үүнээс болж орон даяар эрчим хүч тасарч эхэлсэн. Үүний зэрэгцээ өнөөгийн нөхцөл байдал нь Оростой хэлэлцээ хийх орон зай үлдээхгүй байгааг онцолсон юм.
Үүнээс гадна дайны үлдээсэн хор уршгийг арилгах, тухайлбал дайны үеийн тэсрэх бодисын үлдэгдэл,минаас цэвэрлэхэд дараагийн хоёр жилд дор хаяж 11 тэрбум доллар хэрэгтэй болно. Ойрын 3-10 жилд нэмэлтээр 62.2 тэрбум доллар хэрэгтэй гэхчлэн..
ХБНГУ-ын канцлер Олаф Шольц, Европын комиссын ерөнхийлөгч Урсула фон дер Лейен нар Киев сэргээн босголтод шаардлагатай зардлыг дангаараа даван туулж чадахгүй гэдгийг онцлон тэмдэглэсэн. Улстөрчид ЕХ, Долоогийн бүлэг (Их долоо), санхүүгийн байгууллагууд, олон улсын байгууллага, хувийн хөрөнгө оруулагчдыг оролцуулан Украины сэргээн босголтын асуудлаар "Маршалын төлөвлөгөө" боловсруулахыг санал болгоод буй юм.
Эх сурвалж: Лента болон graphics.reuters.com/