Украины Ерөнхийлөгч Владимир Зеленский Индонезид болсон “Их 20”-ийн орнуудын дээд хэмжээний уулзалтад видео холбоосоор оролцож үг хэлэхдээ Украинд Оросын явуулж буй дайныг зогсоохыг уриалж, 10 заалт бүхий "энх тайвны томъёолол"-оо зарлав.
Зеленский хэлсэн үгэндээ "Оросын сүйрлийн дайныг зогсоох ёстой, тийм боломжтой цаг нь болсон гэдэгт итгэлтэй байна. Энэ нь олон мянган хүний амийг аврах болно" гэдгийг онцлов.
Тэр үг хэлэх үеэрээ "Их 20"-ийг "19-ийн бүлэг" гэж хэд хэдэн удаа дурдсан нь энэ бүлгээс Оросыг хасах саналаа давхар илэрхийлсэн хэрэг байв.
Зеленский дээд хэмжээний уулзалтад оролцогчдод танилцуулсан 10 зүйл бүхий “энх тайвны томъёолол” нь цөмийн болон хүнс, эрчим хүчний аюулгүй байдал, Оросын нутаг дэвсгэрт хоригдож буй Украины бүх хоригдол, иргэдийг суллах, Украины нутаг дэвсгэрийн бүрэн бүтэн байдлыг сэргээх, Оросын цэргийг татан буулгаж, байлдааны ажиллагааг зогсоох, шударга ёсыг сэргээх, хурцадмал байдлаас урьдчилан сэргийлэх зэрэг агуулга тусгагдсан байна.
Зеленский "Дайныг НҮБ-ын дүрэм, олон улсын хуулийн үндсэн дээр шударгаар" дуусгах ёстой гээд энхийн үйл явцыг эхлүүлэхийн тулд Орос цэргээ татаж, Украинд учруулсан хохирлын нөхөн төлбөрийг төлж, нутаг дэвсгэрийн бүрэн бүтэн байдлыг хүлээн зөвшөөрөх ёстой гэж онцолжээ.
Ерөнхийлөгч мөн "дайны дараах аюулгүй байдлын архитектурын гол элементийг бэхжүүлэх" олон улсын бага хурал зарлаж, Оросын түрэмгийлэл давтагдахаас сэргийлэхийг уриалав.
Украины ерөнхийлөгч мөн Украины бүх олзлогдогсдыг суллахыг уриалж, хоригдлуудыг солилцохыг Орост санал болгов.
Түүний тавьсан гол хүсэлтүүдийн нэг нь НҮБ болон ОХУ-ын хооронд 7-р сард байгуулсан Украины үр тарианы хэлэлцээрийг сунгах явдал байв.
Хэлэлцээр эхэлснээс хойш Украины 10 сая тонн үр тариа болон хөдөө аж ахуйн бусад бүтээгдэхүүнийг амжилттай экспортолж, дэлхийн хүнсний хямралаас сэргийлэхэд тус дөхөм болсон гэж НҮБ мэдэгдэв. Гэрээний хугацаа арваннэгдүгээр сарын 19-нд дуусна.
Зеленский "Хүнсний эрх бол дэлхийн хүн бүрийн үндсэн эрх юм" гэж тэр хэлээд, дайн хэзээ дуусахаас үл хамааран гэрээг тодорхойгүй хугацаагаар сунгах ёстой гэдгийг онцолжээ.
Блүүмбэргийн тэмдэглэснээр Ерөнхийлөгч Владимир Путины оронд Оросын төлөөлөгчдийг тэргүүлж буй ОХУ-ын Гадаад хэргийн сайд Сергей Лавров Зеленскийг цахимаар үг хэлэх үеэр танхимаас гараагүй байна. Түүнчлэн Их 20-ийн оролцогчид Лавровын "Украин дахь нацистуудтай тэмцэж байна" гэж дахин мэдэгдсэн үгийг бойкотлоогүй байна.
Эх сурвалж: ВВС