УИХ-ын гишүүн Г.Амартүвшин, Х.Ганхуяг, Н.Алтанхуяг, Ё.Баатарбилэг нарын бүрэн эрхийг түдгэлзүүлэх асуудлаар Халдашгүй байдлын дэд хороо хуралдаж, бүрэн эрхийг нь түдгэлзүүлэх шаардлагагүй гэж үзлээ.
Халдашгүй байдлын дэд хорооны дарга Н.Энхболд “Энэ асуудлыг Хууль зүйн байнгын хороо, Төрийн байгуулалтын байнгын хороо хуралдаж, УИХ-ын чуулганы нэгдсэн хуралдаанд танилцуулна.
Гишүүдээс ирүүлсэн мэдүүлэг, тодруулгыг тодорхой ярих боломж хуулиараа байхгүй. Энэ хэрэг нь Прокурорын байгууллагаас нууцын зэрэглэлтэй ирсэн. Тиймээс цаашид энэ асуудлын талаарх нэгдсэн шийдвэр УИХ-ын нэгдсэн чуулганаар гарна” гэлээ.
Тун удахгүй Хууль зүйн байнгын хороо, Төрийн байгуулалтын байнгын хороо хуралдах ба Хууль зүйн байнгын хорооны даргаар Халдашгүй байдлын дэд хорооны гишүүн С.Бямбацогт ажилладаг билээ. УИХ-ын гишүүний халдашгүй байдлын дэд хороог Н.Энхболд ахалдаг бөгөөд С.Батболд, Б.Бат-Эрдэнэ, Ц.Мөнх-Оргил, С.Бямбацогт нар мөн дэд хорооны бүрэлдэхүүнд багтдаг. Н.Энхболд нь өмөөрөөд гаргасан 4 гишүүнээ С.Бямбацогт нь өмөөрөөд явуулах нь тодорхой бизээ.
Халдашгүй байдлын дэд хороо санал, дүгнэлтээ ХЗБХ, ТББХ-нд хүргүүлэх ба эндээс гарсан саналыг чуулганы нэгдсэн хуралдаанаар хэлэлцэж эцэслэн шийдвэрлэнэ.
