Украины арми Оросын цэргүүд ухарсаны дараа Херсон хотод нэвтэрч, тус хотод үлдсэн Оросын цэргийн албан хаагчдыг бууж өгөхийг уриалсан гэж тус улсын цэргийн тагнуулын албанаас мэдэгдэв.
Украины Батлан хамгаалахын сайдын зөвлөх Юрий Сак ярилцлагадаа одоогийн байдлаар Херсон үндсэндээ Украины Зэвсэгт хүчний хяналтад байгаа гэв. Лхагва гарагийн орой Ерөнхийлөгч Зеленский Телеграм хуудсандаа хотын олон тооны оршин суугчид Украины цэргийнхэнтэй мэндчилж буй бичлэгийг нийтэлжээ.
"Өнөөдөр түүхэн өдөр. Бид Херсоныг буцааж авч байна. Одоогоор манай хамгаалагчид хотын захад байна. Гэхдээ тусгай ангиуд аль хэдийн хот дотор орсон. Херсончууд биднийг хүлээж байсан. Тэд Украиныг хэзээ ч орхиж байгаагүй. Украинд итгэл найдвар үргэлж байдаг" гэжээ.
Хотыг дайсагнагчдаас бүрэн цэвэрлэж амжаагүй байгаа ч Херсончууд өөрсдөө Оросын бэлгэдэл, түрэмгийлэгчдийн ул мөрийг гудамж, барилгуудаас авч хаяж байна. Бусад бүх чөлөөлөгдсөн хотуудад ч мөн адил байна. Биднийг буцаж ирэхийг хүлээж байгаа бусад хотуудад ч мөн ийм байх болно. Украин бүх ард түмэндээ ирнэ" гэж Зеленский оройн үгэндээ хэлжээ.
Украины Үндэсний цагдаагийн газрын дарга Игорь Клыменко хотын нутаг дэвсгэр болон бүс нутгийн эзлэгдсэн бусад суурин газруудад тогтворжуулах арга хэмжээ эхэлснийг зарлав.
Украины цэргийнхэн Херсон мужийн суурин газруудыг эзэлсэн хэвээр байгаа бөгөөд Днепр мөрний баруун эрэгт хүрсэн гэж мэдэгдлээ. Гэсэн хэдий ч Херсоныг эзлэх ажиллагааны эцсийн үр дүнг албан ёсоор зарлаагүй байна.
Украины эрх баригчдын төлөөлөгч хотын оршин суугчдыг гэртээ яаран харихгүй байхыг уриалав. Тэдний хэлснээр, чөлөөлөгдсөн бүс нутгийг бүхэлд нь буудсан хэвээр байна. Тэгээд ч тэнд дулааны шугам сүлжээг засварлаж холбоно гэсэн баталгаа байхгүй.
"Бид иргэдийг эргэж ирэхийг зөвлөхгүй байгаа. Өвөл ирж байгаа тул орон нутгийн оршин суугчдын харилцаа холбоо, үйлчилгээг сэргээх боломжгүй байх магадлалтай" гэв. Түүнчлэн Николаев мужийн захиргааны дарга Виталий Ким Оросын арми орхисон газар нутгаа минажуулсан гэж мэдэгджээ.
Эх сурвалж: ВВС