ОХУ-ын батлан хамгаалах яам Днепр мөрний баруун эрэг, Херсон мужийн нийслэл хотоос цэргээ бүрэн гаргаж дууссаныг зарласны дараа Украины арми Херсон хотыг бүрэн хяналтандаа авсан байна. Оросын арми 2-р сарын 24-нд Украинд орсны дараа хэдхэн хоногийн дотор Украины Херсон мужийн нийслэл хотыг эзэлж авсан нь Москвагийн хувьд хамгийн том бөгөөд стратегийн гол ололт болсон юм. Ийм стратегийн хотоос ухарсан нь Оросын хувьд геополитикийн нэр хүндээ сэвтээх, цаашлаад Украины дайны талбарт тектоник өөрчлөлт авч ирнэ гэж шинжээчид таамаглаж байна.
Украины ерөнхийлөгч Зеленский арми нь Херсон мужийн нийслэлийг өөрийн мэдэлд эргүүлж авсныг “түүхэн өдөр” гэж мэдэгдлээ. Украины цэрэг Херсон хот руу орж ирэхэд хотын оршин суугчид төв талбайдаа баяр ёслолын байдалтай угтан авч, төрийн далбаагаа мандуулж байгаа дүрс бичлэгийг олон улсын хэвлэлүүдээр үзүүлж байна. Оросын арми 30 гаруй мянган цэрэг, 5000 гаруй нэгж зэвсэг техникээ Днепр мөрний зүүн эрэг рүү нүүлгэн шилжүүлж дууссанаа өчигдөр зарласан. Цэргийн нэг ч анги нэгтгэл, зэр зэвсэг баруун эрэгт үлдээгүй, Оросын бүх алба хаагчид зүүн эрэгт шилжин байрласан гэж батлан хамгаалах яамны мэдэгдэлд онцолжээ. Орос цэргийн хангамж нөөцийг татах бололцоогүй болсон учир цэргийнхээ амь насыг нэн тэргүүнд авч үзэж, Днепр мөрний зүүн эрэгт хориглон хамгаалах байрлалд шилжүүлэхээр болсноо энэ 7 хоногийн эхээр зарласан юм. Мөн Москва Путины хувьд ялагдал гэсэн үзэл санааг няцааж, Украинд цэргийн тусгай ажиллагаа нь үргэлжилж байгаа гэж мэдэгдэж байна.
Харин Украины тал Оросын олон тооны цэрэг энгийн иргэний дүрээр Херсонд үлдсэн гэж үзэж байна. Иймээс Украины батлан хамгаалах яамны тагнуулын агентлаг Херсонд үлдсэн Оросын цэргүүдийг бууж өгөхийг уриалсан мэдэгдлийг цахим сүлжээнд оруулжээ. Хэдийгээр Орос цэргээ гаргаснаа зарласан ч Украины арми Москвагийн армийнхны үйл хөдлөлийг анхааралтай ажиглаж, Херсонд тусгай хүчнийхнийг оруулж, сонор сэрэмжээ өндөрсгөсөн байна. Өнгөрсөн 9-р сард ОХУ-ын ерөнхийлөгч Путин Украины эзлэгдсэн дөрвөн мужийг бүрэлдэхүүндээ нэгтгэх шийдвэр гаргасны нэг нь Украины Херсон муж байсан. Иймд Оросын арми Херсоноос ухарсан нь Москвад улс төрийн болон бэлгэдлийн талаасаа том цохилт болж, Украины армид Крымийн хойг, хар тэнгисийн зүүн бүс, Азовын тэнгисийн баруун бүсэд хүрэх зам нээгдэж байна гэж цэргийн шинжээчид мэдэгдэж байна.