Хан-Уул дүүргийн анхан шатны шүүхэд өнөөдөр Н.Түвшинбаярт холбогдох хэргийн урьдчилсан хэлэлцүүлэг явагдаж байна. Өнөөдөр 10:00 цагаас товлогдсон хэргийн урьдчилсан хэлэлцүүлэгт Улсын начин Э.Энхбат агсаны гэргий Б.Нандинцэцэг, өмгөөлөгч О.Санчирбал нар оролцож байгаа аж.
Бусдын амь насыг санаатайгаар хөнөөсөн Н.Түвшинбаярт холбогдох хэргийг прокурорын байгууллагаас шүүхэд шилжүүлсэн боловч анхан шатны шүүхээс тус хэргийг дахин нягтлах шаардлагатай хэмээн прокурорын байгууллагад буцаагаад байсан билээ. Хан-уул дүүргийн прокурорын байгууллагаас уг хэргийг нягталж дуусаад өнгөрсөн гуравдугаар сарын 18-нд шүүхэд шилжүүлсэн юм.
Хэрэгтэн Н.Түвшинбаяр ШШГЕГ-ын харьяа цагдан хорих 461 дүгээр ангид саатуулагдаж байгаа бөгөөд уг хэргийг хаалттай хэлэлцэж байна.
