Богдхан уулын нүхтийн аманд газар шинээр олгохыг БОАЖ-ын сайд Б.Бат-Эрдэнэ зогсоожээ.
Энэ тухай БОАЖ-ын сайд Б.Бат-Эрдэнэ "Богдхан уулын ДЦГ-ын хязгаарлалтын бүсийн зарим хэсэгт газар ашиглалтын хэт төвлөрөл үүсэж, холбогдох хууль, дүрэм журам зөрчигдөж, ашиглалтын нөөц даац хэтэрсэн, байгалийн нөөцийн доройтолд орох, амьтан, ургамлын нөмрөгт сөргөөр нөлөөлөх нөхцөл байдал тулгарч байгаатай холбогдуулан Богдхан уулын ДЦГ-ын Нүхтийн аманд газар ашиглах эрх шинээр олгохыг хориглолоо" хэмээн мэдэгдэв.
Энэ мэтчилэн сүүлийн үед БОАЖ-ын яамны зүгээс авч хэрэгжүүлж буй ажлууд иргэдийн зүгээс онц дүн авч байна. Жишээлбэл:
- “Шинэ сэргэлтийн бодлого”-ын Төрийн бүтээмжийн сэргэлтийг хэрэгжүүлэх, төрийн байгууллагын үйл ажиллагааг оновчтой, хүртээмжтэй, хүнд сурталгүй болгох, Улаанбаатар хотын автозамын түгжрэлийг бууруулах, төвлөрлийг сааруулах ажлын хүрээнд БОАЖ-ын яамыг иргэдэд төрийн үйлчилгээ үзүүлдэг зарим харьяа байгууллагуудынх нь хамт хотын төвөөс нүүлгэж ХУД-ийн IV хороонд байрлах “Байгаль орчны судалгаа шинжилгээний төв” УТҮГ-ын байранд байршуулж байгаа.
- Богдхан уулын хамгаалалтын бүсийг тэлэх шийдвэр гаргасан. Тодруулбал, Богдхан уулын 22896 га хамгаалалтын бүсийг тэлж 28458 га болгон өргөтгөж, нэмж хамгаалалтанд авах шийдвэрийг гаргасан байна.
- Мөн байшин, барилга ихээр баригдаж буй хязгаарлалтын бүс 12453 га-аас 5562 га газраар багасаж, 6891 га болж хумигдсан байна. Ингэснээр Богдхан уулын дархан цаазат газарт барилгажаагүй үлдсэн 5562 га газрыг хамгаалсан байна.
- "Монгол орноо хогноос салгая" аяны хүрээнд 21 сав газрын захиргаад 1,185.3 тонн хог цэвэрлэсэн байна. Үүнд 17,349 хүн нэгдэн ажиллажээ.
- Байгаль хамгаалагчдын 30 гаруй хувь буюу 3 байгаль хамгаалагч тутмын нэг нь халдлагад өртсөн гэсэн дүн байдаг. Байгаль хамгаалагчдын эрхийг хамгаалах, хөгжүүлэх асуудал нь байгаль орчин, аялал жуулчлал, хөдөлмөр нийгмийн хамгаалал, боловсрол, соёлын зэрэг төрийн захиргааны төв байгууллагуудын хамтын ажиллагааны үр дүнд шийдвэрлэх боломжтой цогц асуудал юм. Тиймээс нэн тэргүүнд байгаль хамгаалагчдыг гэнэтийн ослын даатгалд бүрэн хамруулах санаачилгыг Байгаль орчин, аялал жуулчлалын сайд Б.Бат-Эрдэнэ гаргаж, дээрх ажил эцэслэгдэн шийдвэрлэгдэж, хэрэгжихээр боллоо
- Гол мөрөн, нуур, рашаан, булаг шандын хамгаалалтын бүсэд нийт 351 тэмдэгжүүлэлт шинээр байршуулж, 103 тэмдэгжүүлэлтийг сэргээн засварласан.
- Усны сан бүхий газар, ус хангамжийн эх үүсвэрийн хамгаалалтын бүсийн дэглэмийн хэрэгжилтийг ханган ажиллах чиглэлээр 116 удаагийн хяналт шалгалт хийж, стандартын шаардлага хангаагүй 63 энгийн нүхэн жорлон, 2 хогийн цэгийг дарж булж, зөрчлийг арилгасан байна.
- Гол, нуур, булаг, шандыг бохирдуулахгүй, хог хаягдалгүй байлгах, усны сан бүхий газрын хамгаалалтын бүсийн дэглэм мөрдүүлэх талаар мэдээлэл сурталчилгаа, нөлөөллийн арга хэмжээг нийт 131,293 хүнийг хамруулан зохион байгуулсан байна.
Дашрамд дурдахад, Тусгай хамгаалалттай газар нутгийн тухай хуульд зааснаар, Дархан цаазат газрыг байгалийн хэв шинж, төлөв байдал, хөрс, ус, ургамал, амьтны аймгийн онцлог, хүний үйл ажиллагаанд өртөх байдал зэргийг харгалзан онгон бүс, хамгаалалтын бүс, хязгаарлалтын бүс гэж гурав ангилдаг бөгөөд хязгаарлалтын бүсэд зөвхөн аялагч, зөвшөөрөл бүхий бусад хүн түр буудаллах, отоглох, ажиглалт, судалгаа шинжилгээ хийх зориулалтаар зохих журмын дагуу барьсан орон байрыг ашиглахыг зөвшөөрнө.Бусад тохиолдолд Дархан цаазат газарт өвөлжөө, хаваржаа, намаржаа, зуслангийн барилга байгууламж барихыг төдийгүй зохих зөвшөөрөлгүйгээр мал бэлчээрлүүлэхийг хүртэл хориглодог.
