Цахим хөгжил, харилцаа холбооны дэд сайд Б.Болор-Эрдэнэ гаднын улс оронд оччихоод улсынхаа ахмад үе, Орост боловсрол эзэмшсэн үндэсний сэхээтнүүдээ дэлхий даяар гутаан доромжилж буй бичлэг олны дургүйцлийг хүргэсэн.Олны бухимдал дээд цэгтээ хүрсэн учраас МАН-ын дарга нар хийгээд УЗ-ийнхөн ихэд уурлаж Обуна буюу Б.Болор-Эрдэнийг Үндсэн хууль зөрчсөн, зөрчих, зөрчихдөө маш ноцтойгоор зөрчсөн гэж албан тушаалаас нь огцруулахыг шаарджээ.
Тэрбээр:
"NextGen Government буюу шинэ үе хуучин системтэйгээ нүүр тулж, зөрчилдөж байгаа нь үнэн. Өөрчлөлт өвдөлтгүйгээр ирдэггүй гэдгийг ч ойлгож байгаа. Миний хувьд салбарынхаа болон олон хүний дэмжлэг, оролцоотойгоор И-Монголиаг хийх гэж, агентлагаа яам болгох гэж, салбараа томруулах гэж энэ хугацаанд бүх хүчээ зарцууллаа. Ингэхдээ алдаа оноо гаргасанд та бүхнээсээ уучлалт хүсье. Харилцаа холбоо, мэдээллийн технологийн салбарын хамт олон минь, Цахим хөгжлийн яамны хамт олон, И-Монголиагийн хамт олондоо чин сэтгэлээсээ баярлалаа. Бид хамтын зорилгодоо нэгдэж үнэхээр их хөдөлмөрлөсний үр дүнд өнөөдөр цахим шилжилт ид хийгдэж байна. Сүүлийн хэд хоног улс төрийн зохион байгуулалттай дайралт, хуучин системийн завхрал, хуурамч мэдээлэл, ХАРЛУУЛАХ ТЕХНОЛОГИ, авлигажсан системийн цохилтыг яс махандаа шингэтэл ойлгож мэдэрлээ. Мөнгө, ашиг сонирхол, эрх мэдэл байхад хэнийг ч зохион байгуулалттайгаар яллаж болдог юм байна! Энэ систем дотор албан тушаалдаа хоргодоод үлдвэл дасаж, бугширсан системийн нэг хэсэг болохоос өөр аргагүй. Гэхдээ энэ хуучин системийн завхрал оршсоор байгаа үед та бидний хүсээд байгаа өөрчлөлт хэзээ ч хийгдэхгүй. Ганц дайчин ганцаардахгүй биш ганцаарддаг гэдгийг мэдэрлээ.Тиймээс би дэд сайдын албан тушаалаасаа өөрийн хүсэлтээр чөлөөлөгдөх өргөдлөө хүргүүлснээ мэдэгдэж байна. Гэхдээ энэ бугширсан 30 жилийн системд бууж өгч байгаа юм биш шүү!!! Харин ч тэмцэнэ. Тэмцэхдээ илүү эрх чөлөөтэй тэмцэнэ! Илүү олон залуучуудтай хамт тэмцэнэ! Өөрчлөлт өнөөдөр биш гэхэд маргааш заавал ирнэ. Өөрчлөлтийг өөр хандлагатай шинэ үе авчрах л болно. Миний хийж бүтээсэн ажлыг дэмжсээр ирсэн, шүүмжилсээр ирсэн та бүхэнд баярлалаа"гэж сэтгэгдэлээ илэрхийлээд үүрэгт ажлаасаа огцорч байна.Харин энэ талаар Буянгийн Жагаа буюу Б.Жаргалсайхан цахим хуудастаа:
"Н.УЧРАЛ ОБУНАГИЙН БИЧЛЭГ ТАРААСАН ХЭРЭГТ СЭЖИГЛЭГДЭВ... Обунагийн бичлэгийг тараасан асуудал Н.Учрал сэрдэгдэж хэвлэлээр бичигдээд эхэллээ. Одоо энэ бичлэг тараасан, сэвсэн этгээдийг олох ажиллагаа МАН дотор үргэлжилж байгаа бололтой. Н.Учрал гишүүн ч тийм бичлэг тараах сонирхолтой бөгөөд 2000 оны сонгуулиар Г.Уянга, Л.Эрдэнэчимэг нарыг бичлэгийг Т.Алтаншагай, Х.Бат-Ялалт хоёроос худалдан авч тараасан гэдэг дээ. Тийм хардлагад өртсөн ч загас шиг дуугараагүй нэгэн. Ямартаа ч Обуна их л шартайгаар ах нартайгаа үзнэ, Ц.Элбэгдорж шиг олуулаа болж ирнэ гээд хаалга савж буй бололтой. Уг нь бол Коронагийн үеэр хөлгүй шоу хийж 10000 хүн цуглуулсан тусгай эрх ямба эдэлсэн үед Обунаг огцруулах байсан юм. Ямартай ч Засгийн газартайгаа, системтэйгээ үзнэ гээд хатантан ширэв татлаа. Одоо аргадахаас яахав дээ. Түүний хувьд нутгийн ах У.Хүрэлсүхийнхээ ивээл дор явагддаг нэгэн" хэмээн нийтэлжээ.
