МАН-ын бүлэг өнөөдөр хуралдаж, Засгийн газраас өргөн барьсан Газрын тухай багц хуулийн төслүүдийг хэлэлцэхийг дэмжлээ.
Энэ тухайд УИХ-ын гишүүн Б.Энхбаяр “Газрыг хувьд өмчлөх тухай асуудлыг шийдээд 20 жил болсон ч эдийн засгийн эргэлтэд хангалттай орж чадахгүй байна. Өнгөрсөн хугацаанд Монгол улс нийт газрынхаа 0,04 хувийг өмчлүүлжээ. Мөн 1,1 сая иргэн хуулийн этгээд газрын харилцаанд орсон байна. Цаашдаа хувийн өмчийн эрхийг баталгаажуулахын тулд тодотгох шаардлага бий. Хэдийгээр Монгол Улсын Газрын харилцааг зохицуулах хуультай ч хуульгүй мэт аягласаар өнөөдрийг хүрчээ. Жишээ нь, Тусгай хамгаалалттай газарт отог барих гэх эрхээр дамжуулан хэдэн их наядаар үнэлэгдэх, хэдэн зуун мянган иргэний орон сууц ямар ч улсын эрхийн бүртгэлгүй харилцаанд орсон байна. Зайсан, Тэрэлж, Яармагийн асуудал байна. Бид өнөөдөр газрынхаа 97-98 хувийг татвараас чөлөөлдөг. Гэтэл хамгийн үнэтэй мөртлөө үнэгүйдүүлж байгаа юм. Газрын шинэтгэлийн цаана далд эдийн засгийг ил болгох асуудлыг хамт шийднэ. Газрын харилцааны салангид бодлогыг нэгдмэл байдлаар, иргэдэд ойлгомжтой байхаар шийдвэрлэхгүй бол хаа сайгүй зөрчил үүсч байна.
Өнгөрсөн 30 жилд төрийн бүх байгууллагын дарга нар өөрийн байгууллагын эзэмшлийн газрыг зарсан. Зөвхөн Улаанбаатар хотын хэмжээнд 106 төрийн байгууллага өөрийн эзэмшлийн газарт орон сууц барьж зарсан. Суурь судалгаа хийж үзэхэд өнгөрсөн 20 жил мөрдсөн Газрын тухай хууль маань Иргэний хуультайгаа зөрчилдсөн хууль байсан учраас хэрэгжилт дээр доголдол гарчээ гэсэн эрдэмтдийн дүгнэлт гарсан. Товчоор хэлбэл, газар эзэмших эрхтэй 600 мянган хэрэглэгч маань өмчлөх эрхтэй мэтээр ойлгож, эзэмших эрхээ шилжүүлдэг. Бусад улс орны хууль тогтоомжид эзэмших эрх гэж байхгүй. Өмчлөх эрх л гэж бий. Гол нь энэ эрх нь хязгаартайгаар баталгаажих тогтолцоо руу бид шилжих гэж байгаа” гэв.
БХБ-ын сайд Б.Мөнхбаатар “ Газрын тухай хууль 2002 онд батлагдсанаас хойш нийт 32 удаа нэмэлт өөрчлөлт оржээ. Хуульд 7 давхардал, 29 зөрчил, 25 хийдэл байна гэж Хууль зүй, дотоод хэргийн яам үзсэн. Газар олголтыг нэгдсэн хэмжээнд хийдэг болох юм. Нийслэл дээр цахимаар шийдвэрлэнэ. Газрын маргааныг шийдвэрлэхийн тулд зөвлөл байгуулахаар хуульд тусгасан. Кадастрын тухай, Газрын төлбөрийн тухай хууль гээд багцаар шийдвэрлэж байна” хэмээн ярьсан юм.
Харин тусгай хамгаалалттай газар нутагт аялал жуулчлалын зориулалтаар авсан газартаа орон сууц барих зөрчлийг хуулиар хэрхэн цэгцлэх талаар УИХ дахь МАН-ын бүлгийн дарга Д. Тогтохсүрэн “Тусгай хамгаалалттай газар нутгийн тухай хууль одоогоор орж ирээгүй байна. Тусгай хамгаалалттай газар нутагт хууль бус газар олголт, авлигын асуудал хэрээс хэтэрсэн гэж үзэж байгаа. Тиймээс энэ хуулийг шинэчилж, оруулж ирэх ёстой гэж үзэж байгаа. Ойрын үед Засгийн газар оруулж ирэх байх. Газрын тухай багц хууль бол гурван байнгын хороогоор хэлэлцэгдэнэ” гэсэн хариулт өгөв.
