Афганистаны үндэсний армийн элит тусгай хүчний корпусын гишүүд Украин дахь тулалдаанд оролцох саналыг хүлээн авч байгаагаа мэдэгдэв.
Тэд бол АНУ-д бэлтгэгдсэн хөнгөн явган цэргийн ангиуд бөгөөд америк болон бусад холбоотнуудын тусгай хүчнийхэнтэй мөр зэрэгцэн 20 орчим жил тулалдаж ирсэн дайчид юм. Хэрэв тэд Украины дайнд оролцвол тулааны урсгалыг эргүүлэхэд тусална гэж олон мэргэжилтнүүд үзэж байна.
Талибууд засгийн эрхийг гартаа авсны дараа тус улсад хуучин элит тусгай хүчний корпусын 20-30 мянган дайчид үлдсэн бөгөөд америкчууд нэгэн цагт хамтран тулалдаж явсан афган нөхдөөсөө хэдхэн зуун ахлах офицерыг нүүлгэн шилжүүлжээ. Эдүгээ Афганистанд үлдсэн тусгай хүчний олонх нь баригдаж, цаазлагдахаас зайлсхийхийн тулд нуугдаж байгаа юм. Талибанчууд хуучин дэглэмийг дэмжигч, тэр дундаа америкт бэлтгэгдэж өөрсдийнх нь эсрэг тулалдаж явсан тусгай хүчнийхнийг идэвхтэй агнаж байна.
АНУ Афганистаны үндэсний батлан хамгаалах, аюулгүй байдлын армийг байгуулахад бараг 90 тэрбум доллар зарцуулжээ. Харамсалтай нь тэд хэдхэн долоо хоногийн дотор талибуудад улсаа хүлээлгэн өгсөн.
Афганистаны генерал асан Фарид Ахмади эдгээр хүмүүсийг одоо Украин, Сирид байлдахаар элсүүлж байгаа гэж мэдэгджээ. Тэдэнд санхүүгийн сонирхолтой багц санал болгож байна гэж тэр хэлжээ. Хуучин хүчнийхэн мөнгөний төлөө хилийн чанадад тулалдахаас цааргалахгүй байгаа бололтой.
"Foreign Policy" сэтгүүлд бичсэнээр Афганистаны тусгай хүчнийхнийг Украины дайнд элсүүлж байгаа нь "Вагнер групп" гэжээ. /Вагнер групп нь Оросын бизнесмэн Евгений Пригожины үүсгэн байгуулж, хянадаг хууль эрх зүйн статус нь тодорхойгүй Оросын төрийн бус зэвсэгт бүлэглэл юм./
Эх сурвалж хэлэхдээ "Вагнер дэлхийн өнцөг булан бүрээс хүмүүсийг элсүүлдэг. Оросын төлөө тулалалдах гадны цэргүүдийг элсүүлдэг цорын ганц байгууллага бол Вагнер юм. Энэ бол таамаглал биш, сайн мэдэх баримт" гэжээ. Гэвч Өрнөдийн холбоотнууд тэднийг украинчуудтай мөр зэрэгцэн Оросын эсрэг тулалдахыг илүүд үзэх болно. Тэд Оросын талд тулалдахыг хүсэхгүй. Учир нь Оросууд бол тэдний хувьд дайсан нь шүү дээ" гэжээ.
Гэсэн хэдий ч зарим тооцоогоор Афганы 10 мянга орчим хуучин тусгай хүчнийхэн Оросын армийн төлөө тэмцэх урилгыг хүлээн авч магадгүй байна.
"Тэд Пакистан эсвэл Иранд өдөрт 3-4 доллар эсвэл Туркт 10 доллараар ажиллахад бэлэн байгаа бөгөөд хэрэв Вагнер эсвэл өөр ямар нэгэн тагнуулын байгууллага 1000 доллар санал болговол тэд татгалзахгүй" гэж нэрээ нууцлахыг хүссэн цэргийн шинжээч хэлэв. Тэгээд хэрэв хэн нэгийг элсүүлбэл тэр хуучин ангийнхаа талыг авчирч чадна, учир нь тэд ах дүүс шиг дотно хүмүүс" гэжээ. Тэтгэвэрт гарсан афган генералуудын зарим нь Оросын "гадаадын легион"-д элссэн талаар "AP" агентлаг мэдээлсэн байна.
Түүнчлэн "ажилд" авах саналд Оросын иргэншилтэй болох санал багтсан гэж Афганистаны телевиз мэдээлэв.
Оросууд Украины эсрэг тулалдах Афганы хуучин элит тусгай хүчний дайчдад сар бүр 1500 долларын тогтвортой төлбөр санал болгож, өөрсдөд нь болон тэдний гэр бүлд аюулгүй хоргодох газар амлаж байна гэжээ.
Энэ бүхэн талибуудад мөрдөгдөж байгаа хуучин хүчнийхний хувьд татгалзахын аргагүй санал гэдэг нь ойлгомжтой.
Афганистанд нуугдаж байсан тусгай хүчний 35 настай ахмад асан хуучин хамтрагчиддаа Тегеран дахь зуучлах агентлагтай холбогдоход тусалсан гэжээ. Түүний хэлснээр, цэрэгт татагдах хүмүүсийг Афганистанаас Иран руу, дараа нь Орос руу илгээдэг байна.
Иран руу дүрвэсэн Афганистаны элит хүчний дайчид Орост очсон нь тодорхойгүй байгаа ч тэдний нэг нь Ассошиэйтед Пресс агентлагт хэлэхдээ, ийм саналыг авч үзэж байгаа бусад 400 орчим хүнтэй холбогддог гэжээ.
Түүний хэлснээр түүнд өөрт нь болон Афганистанд байгаа эхнэр, гурван хүүхдэд нь Оросын виз олгохыг амласан гэжээ.
Эх сурвалж: ВВС-ээс хураангуйлав
