Монгол Улсын Ерөнхий прокурор Б.Жаргалсайхан Хөгжлийн банкны хэрэгтэй холбоотойгоор УИХ-ын гишүүн Г.Амартүвшин, Х.Ганхуяг, Н.Алтанхуяг, Ё.Баатарбилэг нарын бүрэн эрхийг түдгэлзүүлэх саналыг УИХ-ын даргад хүргүүлсэн. Ё.Баатарбилэгийн хувьд Хөгжлийн банкны асуудалд холбогдоогүй ба хахууль авсан хэргээр шалгагдаж буй.
Энэ дагуу лхагва гараг буюу 27-нд УИХ-ын Халдашгүй байдлын дэд хороо хуралдсан ч тодорхой шийдэлд хүрсэнгүй. Уг асуудлыг ажлын тав хоногт багтаан шийдвэрлэх хуулийн заалттай. Гэвч тус Дэд хорооны дарга Н.Энхболд ковид туссан хэмээн хуралдаа суугаагүй. Халдашгүй байдлын дэд хорооны 5 гишүүн бүгд хуралдахгүй бол 2:2 харьцаатай санал тэнцэх, шийдвэр хүчингүй болох магадлалтай .
УИХ-ын гишүүн Г.Амартүвшин, Х.Ганхуяг, Н.Алтанхуяг, Ё.Баатарбилэг нар гэм буруутай нь тогтоогдвол 2-8 жилийн ял авах хуулийн заалттай. Ерөнхий прокурор Б.Жаргалсайханы түдгэлзүүлэхээр оруулж ирсэн дөрвөн гишүүнийг УИХ-ын нэг ангийн нөхөд нь хамгаалаад аваад үлдвэл ахиж бусад гишүүдийг нэмж түдгэлзүүлэх асуудлыг (Б.Бейсен, А.Адъяасүрэн, С.Бямбацогт, Дамдинням) оруулж ирээд ч нэмэргүй биз ээ. Хамгаалаад л үлдэх магадлал өндөр. УИХ-ын гишүүдийн бүрэн эрхийг түдгэлзүүлэн шалгах иймэрхүү тохиолдлууд өмнө нь мэр сэр гарч байсан ч танхимын гишүүд нь хамгаалаад үлддэг байсан.
Их хурлын гишүүдийн дунд яригдаж буй шуумаар бол эдгээр дөрвөн гишүүнээ хамгаалж үлдэх санал дээр тогтоод байгаа сурагтай. Үе үеийн Ерөнхий прокурорууд дундаас зоригтойгоор ийм олон гишүүдийг эгүүлэн татах саналаа оруулж ирсэн нь Ерөнхий прокурор Б.Жаргалсайханы эр зориг гэж хэлж болно.
Улс орон, ард иргэдийн амьдрал хүнд байхад Хөгжлийн банкнаас их хэмжээний зээлийг давуу байдлаа ашиглан авсан эдгээр гишүүдэд төр төмөр нүүрээ харуулан УИХ-ын гишүүнээс түдгэлзүүлж байгаад шалгах нь хамгийн зөв алхам байлтай.
Харин Халдашгүй байдлын хорооны дарга Н.Энхболд ковидтой гэж бултсан. Ирэх Мягмар гарагаас өмнө шийдвэр гаргахгүй бол асуудал ингэсгээд замхраад өнгөрөх биз. Яг л ЖДҮ-ийн хэрэг шиг Хөдөө аж ахуйн сайд Б.Батзоригийг золиосонд гаргаад өөрсдөө цэвэр мултарсантай адил. Шударга ёс тогтооно хэмээн Ерөнхий сайд болсон Л.Оюун-Эрдэнэ тэргүүтэй МАН-ын эрхэм гишүүд чухам ямар шийдвэр гаргахыг ард түмэн хүлээж байна.