Израилийн Ерөнхий сайд Яир Лапид арваннэгдүгээр сарын 1-нд болсон парламентын сонгуульд ялалт байгуулсан Бенжамин Нетаньяхуд баяр хүргэв. Өнгөрсөн жил Ерөнхий сайдын суудлаас огцорсон Нетаньяху ялалт байгуулан ганцхан жилийн дараа засгийн эрхэнд эргэн ирж байна.
Бенжамин Нетаньяхугийн Ликуд нам болон түүний холбоотнууд болох хэт барууны болон шашны үнэн алдартны намууд Кнессет /парламент/ дэх 120 суудлын 64-т нь ялалт байгуулжээ.
Пүрэв гарагт эцсийн үр дүн тодорхой болмогц Яир Лапид Нетаньяху руу утасдаж, баяр хүргэж, эрх мэдлийг эмх цэгцтэй шилжүүлэхийг баталгаажуулна гэдгээ мэдэгдэв.
Тухайн үеийн Ерөнхий сайд Бенжамин Нетаньяху авлигын хэрэгт буруутгагдаж байсан 2019 онд эхэлсэн Израилийн улс төр дэх эмх замбараагүй үеийг энэ сонгууль дуусгалаа. Гэвч эдгээр хэрэгт холбогдох шүүх хурал үргэлжилж байгаа бөгөөд дараагийн шүүх хурал ирэх даваа гарагт болно.
Санал хураалтын дараа шууд сонгуулийн санал хураалтын дүн гарахад Нетаньяху ирээдүйн засгийн газар нь Израилийн бүх иргэдэд анхаарал халамж тавих болно гэж дэмжигчиддээ хэлжээ.
"Бид аюулгүй байдлыг эргүүлэн авчирч, өндөр үнийг хазаарлаж, Израилийн эргэн тойронд энх тайвны цагирагыг өргөжүүлж, улс орноо өсөн дэвжиж буй гүрнүүдийн эгнээнд эргүүлэн авчрах болно" гэж Нетаньяху хэлэв.
Энэ сонгуулийн дараа Израилийн парламент хуваагдмал хэвээр байна. Тодруулбал, Нетаньяхугийн “Ликуд” нам 32 суудал, Яир Лапидын “Йеш Атид” нам 24, хэт үндсэрхэг шашны сионизм нам 14, одоогийн Батлан хамгаалахын сайд Бенни Ганцын баруун төвийн үзэлтэй Үндэсний эв нэгдлийн нам 12 суудал авчээ.
Түүнчлэн хэт Ортодокс еврей нарын хоёр нам 11, долоон суудал, шашны үндсэрхэг нэг нам зургаа, Арабын Израилийн хоёр нам тус бүр тав, Хөдөлмөрийн нам дөрвөн суудал авсан байна.
Эндээс харвал Засгийн газар байгуулахын тулд Нетаньяхуд эвсэл хэрэгтэй болж байна. Сонгуулийн дараа тэрээр хэнийг түншээр авахаа шууд хэлээгүй байгаа ч тэдний дунд Шашны сионизмын төлөөлөл байх төлөвтэй байна.
Шашны сионизмын удирдагчид болох Итамар Бен-Гвир, Безалел Смотрих нар Арабын эсрэг үг хэлдгээрээ алдартай. Эхнийх нь еврей улсад "үнэнч бус" иргэдийг албадан гаргахыг уриалсан бол хоёр дахь нь Арабын намуудыг хориглохыг хүсч байна.
Тодотгоход араб угсаатнууд Израилийн хүн амын тавны нэг орчим хувийг бүрдүүлдэг.
Бен-Гвир нь Израильд үйл ажиллагаа явуулахыг нь хориглож, АНУ-д террорист байгууллага гэж зарласан хэт үндсэрхэг үзэлтэй талийгаач Мейр Каханегийн шүтэн бишрэгч байсан юм.
Израилийн арабууд, мөн зүүний болон төвийн үзэлтэй еврейчүүдийн хувьд Нетаньяхугийн засгийн газарт "шашны сионизм"-ыг оруулах нь туйлын таагүй үйл явдал болно. Энэ нь Израилийн Палестины нутаг дэвсгэр, түүнчлэн Арабын болон барууны холбоотон орнуудтай харилцах харилцаанд хурцадмал байдлыг нэмж болзошгүй юм.
Үүний зэрэгцээ Безалел Смотрих Батлан хамгаалахын сайд болохыг хүсч байгаа бөгөөд Итамар Бен-Гвир Олон нийтийн аюулгүй байдлын сайдын багцыг шаардаж байна.
Эх сурвалж: ВВС
