Улсын Их Хурлын чуулганы хуралдаан үргэлжилж байна. Өнөөдрийн хуралдаанаар Монгол Улсын 2022 оны Төсвийн тухай хуульд өөрчлөлт оруулах тухай хуулийн төслийг үргэлжлүүлэн хэлэлцэж буй. Хэлэлцэж байгаа асуудалтай холбогдуулан гишүүд асуулт асууж, хариулт авлаа
УИХ-ын гишүүн Б.Бат-Эрдэнэ "Улсын эдийн засаг энэ онд хямралын хүнд нөхцөлд байх нь. Эдийн засгаа юу гэж төсөөлж байна вэ? Ямар дүгнэлт хийж байна вэ? Томоохон стратегийн орд газруудынхаа үр өгөөжийг бид түлхүү ашигламаар байна. Оюу толгойтой 2008 оноос хойш хэрүүл хийсэн. Тодорхой ахиц гарсан. Олборлосон түүхий эд бүтээгдэхүүнээ урьдчилан борлуулахтай холбоотой асуудалд хяналт тавьж байна уу? Хэрвээ тэр их хэмжээний валютыг Монголын банкаар оруулдаг гаргадаг болох юм бол мөнгөний ханш зэрэгт эерэгээр нөлөөлнө шүү дээ".
Сангийн сайд Б.Жавхлан "Бид 2021 онд 2022 оны эдийн засгийн төсвийг хийж байхад 2020 онтой харьцуулахад 2021 онд эдийн засаг өсөлттэй гарсан. Бид энэ өсөлтийг цаашид тогтвортой үргэлжилнэ гэж төсөөлж байсан. Харамсалтай нь бусад улс орнуунаас ялгаатай нь бидний хувьд гурван том сувгаар эдийн засгийн том сөрөг нөлөөллүүд орж ирж байна. Ковидын хүндрэлээс бид бүрэн гарч дуусаагүй байна. Дээрээс нь геополитикийн сөрөг нөлөөллүүд хүчтэй орж ирж байна. Гуравдугаарт урд хилийн нэвтрүүлэх хязгаарлалт байгаа нь бидэнд маш том сөрөг нөлөөлөл бий болгож байна. Өөрөөр хэлбэл гадаад шок бидэнд хүчтэй нөлөөлж байна. Бид дотроо зохицуулалт хийх асуудлууд маш хязгаарлагдмал байна. Иймээс энэ жил эдийн засаг таван хувь өснө гэсэн нэлээд өөдрөг байсан төсөөлөл буурч байна. Харин үүнийг богино хугацааны хүндрэл байлгахын төлөө Засгийн газар бүхий л арга хэмжээгээ авч байна. Хамгийн гол асуудал экспортын асуудал байна. Гол түүхий эдүүдийн үнэ бидэнд ийм ээлтэй байх үед ийм боломжоо алдаж байгаа нь харамсалтай.
Оюу толгойн хувьд олон жил Монголын ард түмний хүсэн хүлээж байсан энэ зүйлүүд дээр энэ Засгийн газрын хувьд хүрсэнд бид аль аль талдаа сэтгэл хангалуун байна. Оюу толгойн хэлцэлд хүрсэн байдал гадны бусад хөрөнгө оруулагчид Монголд хөрөнгө оруулалт хийе гэдэг идэвхийг сэргээсэн. Гагцхүү энэ богино хугацааны хүндрэлүүд хөрөнгө оруулагчдыг битгий үргээчихээсэй гэж бид хичээж ажиллаж байна. Хэлэлцээрийн түвшинд ахиц гарсан учраас энэ хүндрэлийн үед бидэнд туслах ямар боломжууд байна гэдэг дээр бид хэд хэдэн хүсэлтүүдийг тавьж, хамтарч ажиллах тал дээр эргэж хараач гэж байгаа. Юуны өмнө урьдчилгаа авах, мөн баяжмал, хүдэртэй цуг гаргаж байгаа алтнуудыг хилийн цаана салгаж байгаа хэдий ч үүнийг эргээд Монголбанканд тушаах талаар хүсэлтүүд тавьсан" гэж хариуллаа.
