Оросын генералуудын дунд Украины эсрэг цөмийн зэвсэг хэрэглэх тухай яриа өрнөсөн гэж "Нью Йорк Таймс" сонин эх сурвалжаасаа иш татан бичжээ. Гэхдээ энэ хэлэлцүүлгийг Ерөнхийлөгч Владимир Путины түвшинд хүрээгүй гэж сонин тэмдэглэжээ.
Оросын армийн өндөр албан тушаалтнууд Москва Украинд тактикийн (харьцангуй бага чадлын ) цөмийн зэвсгийг хэзээ, хэрхэн ашиглах талаар ярилцсан гэж АНУ-ын засаг захиргааны хэд хэдэн эх сурвалж мэдээлэв. АНУ-ын засгийн газар аравдугаар сарын дундуур үүнийг мэдсэн бөгөөд дээрх сонинд бичсэнээр "саяхан" хэлэлцүүлэг болсон. Харин Владимир Путин эдгээр хэлэлцүүлэгт оролцоогүй гэж нийтлэлд дурджээ.
Ийм яриа хэлэлцээ болж байгаа нь Оросын генералууд хуурай замын цэргийнхээ ажиллагааны үр дүнд сэтгэл дундуур байгааг харуулж байгаа бөгөөд Владимир Путин цөмийн зэвсэг хэрэглэнэ гэж сүрдүүлсэн нь зүгээр нэг үг биш байж магадгүй гэж хэвлэлд тэмдэглэжээ.
Үүний зэрэгцээ NYT агентлаг Америкийн өндөр албан тушаалтнууд Орос улс цөмийн зэвсгээ хөдөлгөж, цохилт өгөхөд бэлтгэх арга хэмжээ авч байгааг нотлох баримт олж хараагүй гэж мэдэгдэв.
ОХУ-ын зэвсэглэлд тактикийн 2000 хүртэлх цөмийн зэвсэг байгаа гэж Пентагон тооцоолжээ. Ийм төрлийн зэвсгийг байлдааны талбарт ашиглаж байгаагүй юм.
Цөмийн зэвсгийн тухай яриа
Украин руу довтолж эхлэх үеэс Орос улс тактикийн буюу бага чадлын цөмийн зэвсэг ашиглаж болзошгүй тухай бүгд л ярьж байсан. Төрийн Думын зарим депутат, Чеченийн тэргүүн Рамзан Кадыров ийм алхам хийхийг уриалж, Украины Ерөнхийлөгч Владимир Зеленский, Тагнуулын төв газрын дарга Уильям Бернс нар энэ эрсдэл ноцтой байгааг анхааруулж байв.
Оросууд эхлээд Харьков мужид, дараа нь Херсон мужид хэд хэдэн удаа ялагдал хүлээсний дараа цөмийн зэвсэг ашиглах боломжийн тухай яриа эрчимжсэн.
Владимир Путин цөмийн зэвсэг хэрэглэнэ гэсэн далд сүрдүүлгийг нэг бус удаа хэлж байсан. "Хэрэв ОХУ-ын нутаг дэвсгэрийн бүрэн бүтэн байдалд заналхийлвэл Орос улс боломжтой бүх аргаа ашиглана, энэ бол хий хоосон яриа биш" гэж Путин 9-р сарын 21-нд Орост дайчилгаа зарлах үеэрээ телевизээр үг хэлэхдээ дурдсан.
Нутаг дэвсгэрийн бүрэн бүтэн байдалд заналхийлж байгаа гэдэг нь дайны эхэн үед эзлэн авч, намар хавсаргасан Херсон муж болон өөр гурван бүс нутаг руу хийх Украины сөрөг довтолгоо гэсэн үг юм.
10-р сарын сүүлчээр Орос улс стратегийн цөмийн цохилт өгөх сургуулилт хийсэн. Уг сургуулилт Москвагийн зүгээс Украиныг "бохир бөмбөг" бүтээсэн гэж буруутгаж байгаатай холбогдуулан болсон юм.
Аравдугаар сард ОХУ-ын Батлан хамгаалахын сайд Сергей Шойгу АНУ, Их Британи, Францын цэргийн газрын дарга нартай ойр ойрхон утсаар ярьж, Украины ашиглахаар бэлтгэж буй "бохир бөмбөг"-ийн талаар анхааруулсан. Хариуд нь Барууны орнууд Киевийн нэгэн адил үүнийг худал гэж мэдэгдээд буй.
Харин өнгөрсөн долоо хоногт ОХУ-ын ерөнхийлөгч Украины эсрэг цөмийн зэвсэг хэрэглэх нь утга учиргүй гэж мэдэгдээд байна.
"Цөмийн аюул заналхийллийн талаар өнөөдөр шуугиан дэгдээж байгаа зорилго бол энгийн зүйл: Барууныхны өнөөг хүртэл бүгдэд дарамт үзүүлэх гэсэн оролдлого дуусаагүй бөгөөд тэд шинэ аргументуудыг хайж байна. Орос улс цөмийн зэвсэг ашиглах боломжийн талаар хэзээ ч шууд ярьж байгаагүй, зөвхөн өрсөлдөгчдийн дайралт" гэж Путин хэлэв.
АНУ-ын засаг захиргааны албан тушаалтнууд NYT агентлагт хэлэхдээ Владимир Путиныг тактикийн цөмийн зэвсэг хэрэглэхээр төлөвлөөгүй гэж бодож байна. Лхагва гарагт ОХУ-ын Гадаад хэргийн яам мэдэгдэл гаргаж, Орос улс цөмийн дайныг хүлээн зөвшөөрөхгүй байх зарчмыг хатуу баримталж байна гэж мэдэгдсэн. тухай дурджээ.
Эх сурвалж: ВВС
