2021 оны есдүгээр сард хэрэгтэн У нь хамтран амьдрагч Х-гээ “Хоёр утасны дугаар барилаа” гэж маргалдан индүүгээр түлсэн хэрэг гарсан байна.
Тодруулбал, Х гэрчийн мэдүүлэгтээ “Би У-тай нэг жил гаруй хугацаанд хамтран амьдарсан. Тэр 10 удаа гэр бүлийн хүчирхийллийн хэргээр шалгуулж байсан. Миний дээрээс буцалсан халуун ус асгаж байсан, хүүхдүүдийг маань шөнөжин гарыг нь өргүүлэн зогсоож байсан. 2021 оны есдүгээр сард миний дух руу хутга шидэж байсан. Гэрт нэг хүүхэн дагуулж ирэхээр нь уурлатал миний дээрээс дэвссэн. Сална гэхээр ээжийг маань шатаана гэж дарамталдаг байсан” гэжээ.
Mөн 2021 оны 11 дүгээр сарын 27-ны шөнө хөгжлийн бэрхшээлтэй П.С нь “Ээжийг зодлоо” хэмээн У-г эсэргүүцсэнийхээ улмаас түүнд онц хэрцгийгээр зодуулж, амь насаа алджээ.
Олон удаа хүчирхийлэл үйлдэж, нэг удаа хүний аминд хүрсэн гэх хэргийг аравдугаар сарын 5-нд Сонгинохайрхан дүүргийн эрүүгийн хэргийн анхан шатны шүүхээс шүүж У-д 15 жил дөрвөн сар хорих ял оноож, хохирогчдын нэхэмжилсэн мөнгийг албадан төлүүлэхээр болсон байна.
