Хөгжлийн банкны хэрэгт холбогдсон зургаан гишүүний бүрэн эрхийг түдгэлзүүлэх саналыг Ерөнхий прокурор гаргах гэж байгаа тухай мэдээлэл түгээд байсан билээ. Гэвч өнгөрсөн даваа гариг /2022.4.25/-т Ерөнхий прокуророос УИХ-ын даргад нэр бүхий дөрвөн гишүүний бүрэн эрхийг түдгэлзүүлэх санал ирүүлжээ. Яригдаж байсан хүмүүсээс Хөгжлийн банкнаас төрсөн дүүгийнх нь компани 2019 онд 61 тэрбум төгрөгийн зээл авсан асуудалд холбогдоод байсан УИХ-ын гишүүн С.Бямбацогт сугарч үлдсэн байна.
Ховдод зарлагдсан тендер болгонд оролцож явдаг С.Бямбацогтын тухайд Халдашгүй байдлын дэд хорооны гишүүн бөгөөд Хууль зүйн байнгын хорооны дарга юм. Мөн оффшор данс зэрэг олон асуудалд нэр нь холбогдож байдаг Сү. Батболд энэ дэд хорооны гишүүн. Тэгэхээр энэхүү дэд хороо УИХ-ын гишүүдийн бүрэн эрхийг түдгэлзүүлж чадах уу гэдэг нь ЭРГЭЛЗЭЭ дагуулж байна.
