Замын хөдөлгөөнд оролцож буй жолооч нар урсгал сөрөх, тэмдэг тэмдэглэгээ зөрчих, зогс гэсэн шугам давж зогсох, уулзвар гарц хаах, уулзварт давхар эргэх, эгнээ хааж зогсох, эгнээ байр буруу эзлэх, гэрлэн дохио зөрчих гэх мэтээр замын хөдөлгөөний дүрмийг ихээр зөрчдөг. Үүний улмаас түгжрэл үүсч, хөдөлгөөний ачааллыг ихээр бий болгож байна. Тиймээс замын хөдөлгөөний соёлыг дээшлүүлэх, зөрчлийг бууруулах, иргэдийн оролцоо, хяналтыг нэмэгдүүлэх, болзошгүй аюулаас урьдчилан сэргийлэх зорилгоор Замын хөдөлгөөний удирдлагын төв, Тээврийн цагдаагийн газар хамтран “E-Police” аппликэшнийг нэвтрүүлсэн байдаг.
Эл аппликейшнээр дамжуулан гэмт хэрэг, зөрчлөөс урьдчилан сэргийлэх ажилд идэвхтэй оролцсон иргэн, хуулийн этгээдийг урамшуулах журмыг албаныхан боловсруулж эхэлсэн бөгөөд одоогоор батлагдаагүй, хэлэлцүүлгийн шатанд яваа аж.
Тодруулбал, E-police аппликэйшнээр автомашины зөрчлийг мэдээлсэн иргэнд тухайн торгуулийн мөнгөн дүнгийн 20 хувийг нь авах боломжийг бүрдүүлэхээр албаныхан ажиллаж байгаа юм.
Харин E-police аппликэйшнээр автомашины зөрчлийг мэдээлсэн иргэн тухайн торгуулийн мөнгөн дүнгийн 20 хувийг нь авах тухай мэдээлэл гарснаар нэг өдрийн дотор ирэх зөрчлийн мэдээллийн тоо нэмэгдсэн байна.
Тухайлбал, өнгөрсөн долоо хоногт 3732 зөрчлийн мэдээлэл ирсэн нь өмнөх долоо хоногоос 1336 зөрчлөөр нэмэгджээ.
