Хятадын Иргэний нисэхийн удирдах газрын зүгээс тус улсын томоохон агаарын тээврийн компаниудын олон улсын нислэгийн тоог нэмэгдүүлэхээр төлөвлөж байгаагаа зарласан тухай "Bloomberg" мэдээлэв. Өөрөөр хэлбэл, энэ сарын 30-ны өдрөөс эхлэн Хятад улс олон улсын нислэгийн тоогоо хоёр дахин нэмэгдүүлж, долоо хоногт 840 нислэг хийхээр төлөвлөж байна.
Мэдээнд дурдсанаар дэлхийд эдийн засгийн хэмжээгээрээ хоёрдугаарт эрэмбэлэгддэг тус улс хилийн чанад дахь аяллаа сэргээхийн дохио байж магадгүй гэжээ. Мөн Хятад руу ирж буй гадны зорчигчдын хорио цээрийн дэглэмийн хугацааг 7 хоногоос бууруулахаар төлөвлөж байгаа гэсэн мэдээлэл ч гарав. Энэ мэдээллийн ачаар China Southern Airlines, China Eastern Airlines, Air China зэрэг компаниудын хувьцааны ханш өсчээ. Хятадын Иргэний нисэхийн удирдах газрын албаны хүн “Гадаадад аялагчдын тоо энэ оны гуравдугаар улиралд мэдэгдэхүйц нэмэгдээд байна. Тодруулбал гуравдугаар улиралд 537,000 хүн гадны орнуудад зорчсон нь хоёрдугаар улиралтай харьцуулахад 73 хувиар өссөн үзүүлэлт юм" хэмээн дурдсан байна. Түүнчлэн тус байгууллагын зүгээс “Ирэх таван сарын хугацаанд 92,970 зорчигч хилийн чанад руу аялахаар төлөвлөж байгаа нь өмнөх оны мөн үетэй харьцуулахад 2.4 хувиар өссөн үзүүлэлт юм” хэмээн цохон тэмдэглэжээ.
Эх сурвалж: Maeil
