Эрүүл мэндийн сайдын тушаалаар "Өргөө" амаржих газрын захирал Ж.Энхцэцэгийг чөлөөлж, түр орлон гүйцэтгэгчээр “Амгалан” амаржих газрын захирал Ц.Батболдыг томилсон. “Өргөө” амаржих газрын нөхцөл байдал ямар байгаа талаар тус газрын захирал Ц.Батболдтой ярилцлаа.
-Өргөө амаржих газарт ЗГХЭГ-аас шалгалт хийж байгаа. Амаржих газрын үйл ажиллагаа хэвийн явагдаж байна уу?
-“Өргөө” амаржих газрын эмнэлгийн тусламж, үйлчилгээ хэвийн явагдаж, эх, нярай, эмэгтэйчүүдийг хүлээн авч эмчилгээ, үйлчилгээг үзүүлж байна. Үйл ажиллагаа нь саатсан зүйл байхгүй. ЗГХЭГ-аас хөндлөнгийн хяналт, шалгалтын ажлын хэсэг гараад “Өргөө” амаржихтай холбоотой асуудлуудыг шалгаж байгаа. Эмнэлгийн зүгээс шаардлагатай мэдээллээр хангаж байна. Шалгалтын хариу гарахаар хууль, журмынхаа дагуу асуудлууд тодорхой болох байх.
-Таныг эмнэлгийн захирлаар томилогдож ирэхэд нөхцөл байдал ямар байв?
-Салбарт төдийгүй олон нийтэд янз бүрийн мэдээллүүд тарж, бас яг цэгцтэй ойлголт багатай байна. Өнгөрсөнд үүссэн асуудлаас болж эмнэлгийн эмч, ажилтнуудын сэтгэл зүй, ажиллах сонирхол, идэвх санаачилга буурсан, айдас, түгшүүртэй байна. Энэ тал дээр бид онцгой анхаарахгүй бол болохгүй учраас үүнд чиглэсэн тодорхой алхмуудыг хийхээр төлөвлөсөн.
“Өргөө” амаржих газрын хувьд 2022 оны аравдугаар сарын байдлаар тендер сонгон шалгаруулалт шийдэгдээгүй өдий хүрсэн байна. Тавдугаар сараас хойш эм тариа, бараа материалын худалдан авалтын гэрээний сунгалт, болон гэрээнүүд хийгдээгүйн улмаас 50 гаруй компанид 1.5 тэрбум төгрөгийн эмийн болон бараа материалын өр хуримтлагдсан байна. Уг асуудлыг яаралтай шийдэхгүй бол эмнэлэгт компаниуд эм нийлүүлэхгүй байх хүртэл арга хэмжээ авах сануулга ирсэн. Мөн 2022 оны эхний хагас жилийн байдлаар Эрүүл мэндийн даатгалын сангаас оны эхний зургаан сарын гүйцэтгэлийн санхүүжилтээсээ 700 гаруй сая төгрөгийг авч чадаагүй нь эмнэлэг хэвийн үйл ажиллагаа явуулах, цаашлаад эмч, ажилтнууд цалингаа хугацаанд нь авч чадахгүй байх эрсдэлийг дагуулж байгаа юм.
Тиймээс ажлаа авсан өдрөөсөө эхлэн санхүүгийн дүн шинжилгээ хийх, эмнэлгийг хэвийн үйл ажиллагаагаар хангахад шаардлагатай асуудлуудыг шийдэхэд чиглэн ажиллаж байна. Төсвийн жил дуусаж байхад санхүүгийн хүндхэн нөхцөлд байгаа нь нэлээдгүй олон асуудал дагуулахаар байна. Тухайлбал, эмийн өр төлбөрийг барагдуулахгүй бол эм тасалдал үүсэх, эмнэлгийн тусламж, үйлчилгээ доголдох, хүний эрүүл мэндэд нөлөөлөх хүртэл эрсдэл бий болсон учраас бид өр төлбөрийг барагдуулахаар холбогдох байгууллагуудад хүсэлтээ тавьсан.
-“Өргөө” амаржих газрын эмч, ажилчид олноороо ажлаасаа гарсан гэх мэдээлэл байсан. Бодит байдал дээр ямар байгаа вэ?
-Ажилдаа ороод юуны өмнө эмнэлгийн эмч, ажилтнуудтай тэдний ажиллах орчин, цалин хөлс, нийгмийн асуудал, ажлын ачаалал зэргийн талаар бүх тасаг, нэгжүүдээр уулзалтуудыг хийсэн. Уулзалтаас гарсан санал, бодлыг эмнэлгийн дотоод мэдээлэлтэй тулгахад өнгөрсөн хугацаанд эмч, ажилтны цалин нэмэгдээгүй, нийгмийн асуудлууд орхигдсон нь харагдсан.
“Өргөө” амаржих газарт үүссэн бас нэг анхаарах зүйл нь өнгөрсөн хугацаанд 138 гаруй мэргэжлийн эмч, мэргэжилтнүүд ажлаасаа гарсан нь хүний нөөцийн хомсдолд орж, ажлын ачаалал нэмэгдэхэд эрс нөлөөлсөн байгаа юм. Өнөөдрийн байдлаар ЭХО-ны эмч, нярайн эмч хүрэлцээгүй, нярайн сувилагч нарын дутагдалтай байна. Үүнээс үүдэн нярайн сувилагч нар ачаалал өндөртэй ажиллаж байна.
Өнгөрсөн хугацаанд 138 мэргэжлийн эмч, мэргэжилтэн ажлаасаа гарсан нь хүний нөөцийн хомсдолд орж, ажлын ачаалал нэмэгдэхэд эрс нөлөөлсөн.
Өнөөдрийн байдлаар нийт 480 ажлын байрны орон тоотой боловч 412 хүний бүрэлдэхүүнтэй ажиллаж байна.
Ажлаасаа гарсан хүмүүсийн санал гомдлыг талаар судалж үзэхэд ажилчдаас нэлээдгүй гомдол саналыг эмнэлгийнхээ удирдлагууд болон Үйлдвэрчний эвлэлдээ хүргүүлж байсан. Гэвч асуудал шийдэгдээгүйн улмаас олноороо ажлаасаа гарсан юм билээ. Үйлдвэрчний эвлэлээс ирсэн санал, гомдлыг хүлээн авч удирдлагадаа уламжилдаг байсан гэсэн. Одоо эмнэлгийнхээ хүний нөөцийн тал дээр бодлогоор шуурхай алхмууд хийхгүй бол цаашид ч ажлаас гарах урсгал нэмэгдэх эрсдэл үүснэ.
Түүнчлэн эмнэлгийн захиргаа, санхүүд ажиллаж байгаа ажилтнуудын дийлэнх нь хоёроос бага сар ажилласан буюу шинээр ажилд ороод удаагүй хүмүүс их, байгаа юм. Захиргаа, санхүүгийн хэлтсүүдэд хүний нөөцийн тогтворгүй байдал, батлагдсан бүтцийн дагуу үйл ажиллагаагаа явуулаагүйн улмаас менежментийн доголдолд хүрснийг өнөөдрийн эмнэлгийн бүх талын нөхцөл байдал, дүн шинжилгээ харуулна. Ер нь байгууллагын дотоод уур амьсгалыг сайжруулах, айдас түгшүүргүй хэвийн ажлаа хийх боломжоор хангах зорилгоор хэд хэдэн ажлуудыг хийж байна. Удахгүй үр дүн гарч эхэлнэ гэж найдаж байна.
-“Өргөө” амаржих газрын эмч үйлчлүүлэгчдээс мөнгө төгрөг авсан гэх гомдол ирж байна уу?
-Одоогоор тийм гомдол ирээгүй. Бид эмч, ажилтнаа иргэдийнхээ эсрэг турхирахаас илүүтэй тэднийг ажиллах боломжоор нь хангах, иргэддээ тусламж, үйлчилгээ үзүүлэх тогтвортой нөхцөл, орчноо хангаж өгөх нь чухал. Эрүүл мэндийн салбарт бэлтгэгдсэн чадварлаг, сэтгэлтэй эмч, мэргэжилтнүүдээ дэмжих, мэргэшүүлэх, сургах, ачааллыг нь тэнцвэржүүлэх, нээлттэй ил тод болгох тал дээр түлхүү анхаарч ажиллана.
