Улсын Их Хурлын ээлжит хуралдаан эхэллээ. Хуралдааны эхэнд УИХ-ын гишүүн Ш.Адьшаа үг хэллээ.
Тэрбээр “Монгол Улсын Засгийн Газраас төсвийн хуультай уялдуулан олон хуулийг өөрчлөх санал оруулж ирсэн байгаа. Би энэ олон хуулийг өөрчлөх санал дотор юу нуугдаад байгааг гайхаж байна. Энэ дээр ашигт малтмалын тухай хуульд нэмэлт өөрчлөлт оруулах тухай хуулийг засгийн газраас өргөн мэдүүлсэн байна. Засгийн газрын салбар хариуцсан сайдаас нь санал авахгүйгээр энэ хуулийн төслийг оруулж иржээ. Энэ хуулийн төслийн гол үзэл баримтлал нь нутгийн захиргааны байгууллага тусгай зөвшөөрөл эзэмшигчтэй гэрээ байгуулж хандив авах тухай, ажиллах хүчний тухай асуудлыг оруулж иржээ. Монгол Улсын Үндсэн Хуульд зааснаар газрын доорх баялаг төр, нийтийн өмч байна гэсэн байдаг. Бид өнөөдөр ашигт малтмал газар нутгийнхаа ихэнхийг лиценз хэлбэрээр гаднынханд өгчихсөн байна. Гэтэл өнөөдөр төсвийн хуулийг далимдуулж ийм зүйл оруулж ирсэн нь хардлага төрүүлж байна. Лиценз эзэмшигч хандив өгч байна нэрээр тэр орон нутгийн хэдэн дарга нар хувааж авдаг ийм тогтолцоог хуулиар баталгаажуулж байгаад харамсаж байна. ЗГ энэ хуулиа татаж ав. Баруун бүсийн хар ус нуурын ай сав газарт гадаад дотоодынхонтой нийлж ийм хууль бус үйл ажиллагаа явуулахыг зөвшөөрөхгүй. Гуя дагуулсан хүзүү гэдэг шиг Засгийн Газар төслийн хуулиар далимдуулж хулгай луйвар хийхээ боль” хэмээн хэллээ.
Г.Бүжинлхам
