УИХ-ын энэ хаврын ээлжит чуулганаар хэлэлцэх асуудлын жагсаалтанд Ардчилсан намын бүлгээс 18 хуулийн төсөл оруулсны нэг нь гэмт хэрэг зөрчлөөс урьдчилан сэргийлэх тухай хуульд нэмэлт өөрчлөлт оруулах тухай хуулийн төсөл юм. Төслийг санаачилагч УИХ-ын гишүүн Б.Пүрэвдорж, Гэмт хэрэг зөрчлөөс урьдчилан сэргийлэх тухай хуульд нэмэлт өөрчлөлт оруулах тухай хуулийн төслөө өнөөдөр /2022.04.27/ УИХ-ын дарга Г.Занданшатарт өргөн барилаа.
Үндсэн хуульд зааснаар, Монгол Улсын иргэн үзэл бодлоо чөлөөтэй илэрхийлэх эрхтэй. Энэхүү үзэл баримтлалын дагуу Зөрчлийн тухай хуульд нэмэлт өөрчлөлт оруулж, “гүтгэх” зөрчлийг хүчингүй болгосон. Харин энэхүү өргөн барьсан төслөөр хэн нэгний нэр төр, алдар хүндэд халдсан эсэхийг цагдаагийн албан тушаалтан шалган тогтоож, төрийн албадлага хэрэглэх шийдвэр гаргаж буйг өөрчлөх юм.
Хуулийн төсөл санаачлагч, УИХ-ын гишүүн Б.Пүрэвдорж “Хүний үзэл бодлоо илэрхийлэх эрх чөлөөг боомилсон, үзэл бодлоо илэрхийлсэн иргэнийг гэмт хэрэг, зөрчлөөс урьдчилан сэргийлэх хууль зөрчсөн хэмээн зальхай аргаар амыг нь үдэх арга зохиосон заалтыг хүчингүй болгох зорилготой хуулийн төсөл өргөн барилаа. Шүүх, прокурорын хяналтгүйгээр иргэдийг нэн ялангуяа хэвлэл мэдээллийн байгууллага, сэтгүүлчийг нэг удаа зөрчвөл 100 мянга, давтан үйлдсэн гээд 500 мянгаар торгож, давтан үйлдвэл баривчлах ялаар шийтгэж байгааг болиулах нь энэ хуулийн өөрчлөлтийн гол зорилго” гэдгийг төсөл өргөн барих үеэрээ тайлбарлалаа.