Өнөөдрийн намрын ээлжит чуулганы үзээс хойших хуралдаан эхэллээ. Хуралдаанаар гэмт хэрэг, зөрчлөөс урьдчилан сэргийлэх тухай хуульд өөрчлөлт оруулах тухай хуулийн төслийг хэлэлцэх эсэх асуудлыг хэлэлцэж байна. Энэ хүрээнд гишүүд өөрсдийн саналаа хэлж байна.
УИХ-ын гишүүн Б.Энхбаяр “Улсын Их Хурал иргэнийг үзэл бодлоо илэрхийлснийх нь төлөө торгоно шийтгэнэ гэдэг хууль огт гаргаагүй. Ийм заалт байхгүй. Бид НҮБ-ийн өмнө хүлээсэн үүрэгтэй улс. Тэр ч утгаараа хүний үзэл бодлыг шоронжуулахгүй гэдэг дээр МАН ч тэр АН ч тэр аль аль нь манлайлдаг. Ийм шинжийн аливаа өөрчлөлт орохыг эсэргүүцэж таслан зогсоодог. Тухайлбал хаврын чуулганаар доромжлохыг гэмт хэрэгт тооцъё гэдэг заалтыг манай парламентын гишүүд нам үл харгалзан таслан зогсоосон. УИХ-ын гишүүн, хууль санаачлагч Б.Пүрэвдорж гишүүний тараасан судалгаанаас харахад 300 гаруй иргэнийг үзэл бодлоо илэрхийлснийх нь төлөө торгосон гэсэн байна. Энэ судалгаанаас “ГАЙХАЛ” төрүүлсэн зүйл бол үзэл бодлоо илэрхийлснийх нь төлөө торгоно гэж хуульд заагаагүй байтал энэ 300 гаруй хаана ямар цагдаа торгов гэдэг байна. Үүнийг шалгахад эдгээр зөрчлийн олонх Дорноговь, Баянхонгор зэрэг аймагт гарсан байна. Энэ асуудал хуульд байна уу, хуулийг хэрэгжүүлж байгаа цагдаагийн даргад байна уу. Хаана ийм завхрал гарав. Хууль тогтоогч алдаа гаргав уу, хууль хэрэгжүүлэгч алдаа гаргав уу гэдгийг олж тогтоох боломж бүрдлээ” гэв
Г.Бүжинлхам
