Оросын армийн хяналтад байгаа Херсон хотын эрх баригчид оршин суугчдыг Днепр мөрний баруун талаас зүүн эрэг рүү нүүлгэн шилжүүлж байна. Энэ нь тус хот руу хийх Украины цэргийн сөрөг довтолгоотой холбоотойгоор Украин дахь Оросын армийн хамтарсан бүлгийн командлагч Сергей Суровикины гаргасан "хэцүү шийдвэр" болов.
Мөн Херсон мужийн эрх баригчид нүүлгэн шилжүүлэлтийг "зохион байгуулалттай" хэмээн тодотгож энэ нь хэдэн арван мянган хүний амь амьдралтай холбоотой гэжээ.
"Ойролцоогоор бид 50-60 мянган хүнийг зүүн эрэг рүү, цаашлаад хэн хүссэнийг нь ОХУ-ын бусад бүс нутаг руу шилжүүлэхээр төлөвлөж байна" гэж Херсон мужийн захиргааны тэргүүн Владимир Салдо хэлэв. Түүний хэлснээр сүүлийн хоёр өдрийн дотор таван мянга гаруй хүн Херсон хотыг орхисон байна.
"Зүүн эрэг дээр хүмүүс хэсэг хугацаанд оршин суух газруудыг бэлдсэн. Бид бүгдээрээ энэ нүүлгэн шилжүүлэлтийг түр хугацааных гэж харж байгаа"гэв.
Нүүлгэн шилжүүлэлтийг зарлахтай зэрэгцэн тус бүс нутгийн эрх баригчид Днепр мөрний баруун эрэг рүү орох хаалгыг энгийн иргэдэд долоо хоногийн турш хааж байгаагаа мэдэгдэв.
BBC-ийн бичсэнээр 10-р сарын эхээр Украины анги нэгтгэлүүд Днепр мөрний баруун эрэг дэх Оросын хамгаалалтыг эвдэж, Берислав болон Каховская усан цахилгаан станцын далангийн чиглэлд урагшилж эхэлжээ. Мөн үүнтэй холбоотойгоор Херсонд байрлаж байсан Оросын цэргүүд бүслэгдэх аюул бодитой болжээ.
Украины Ерөнхийлөгчийн Тамгын газрын дарга Андрей Ермак хэлэхдээ,
"Оросууд Херсоны оршин суугчдыг манай арми хотыг буудаж байгаа тухай хуурамч мэдээллээр айлгах гэж оролдож байна. Украины Зэвсэгт хүчин Украины хотуудыг бууддаггүй" гэж Ермак бичжээ.
Сануулахад, Херсон мужийн оршин суугчдыг тус мужийн нутаг дэвсгэрээс гарахыг зөвлөж байна гэж Володимир Салдо 10-р сарын 13-нд мэдэгдэв. Үүний дараа ОХУ-ын Ерөнхий сайдын орлогч Марат Хуснуллин Херсон мужийн оршин суугчдыг нүүлгэх хөтөлбөр хэрэгжүүлж эхэлснээ зарлаж, шинэ газар нутагт үлдэхээр шийдсэн хүмүүсийг үнэгүй газар, орон сууцаар хангахаа амлав.
Долоо хоногийн дотор орон нутгийн эрх баригчид зөвлөмжөөс үйлдэл рүү шилжиж чадсан байна. Лхагва гарагийн өглөө тус бүс нутгийн оршин суугчид "Украины Зэвсэгт хүчний зүгээс буудах аюулын улмаас" яаралтай нүүлгэн шилжүүлэхийг зааварласан мессеж хүлээн авчээ.
Нүүлгэн шилжүүлэх хүмүүст зориулсан зааварчилгааг засаг захиргааны цахим хуудас дээр нийтэлсэн байна. Оршин суугчид 50 кг-аас ихгүй жинтэй эд зүйл, бүтээгдэхүүнийг авч явахыг зөвшөөрчээ.
Олон нийтийн сүлжээгээр тараасан ухуулах хуудсаар оршин суугчдыг "гэр бүлээ аврахын тулд" Днеприйн зүүн эрэг рүү нүүхийг уриалж байна гэжээ.
Гэвч одоо Херсоноос гарахад хэцүү байна. Учир нь эрх баригчдын зохион байгуулсан гатлага онгоцонд асар их дараалал үүссэн, төлбөртэй тээвэрлэгчид ажиллахгүй байгаа тухай мэдээлэл байна.
Олон нийтийг нүүлгэн шилжүүлэхийн өмнөхөн Украин дахь Оросын цэргийн бүлгийн шинээр томилогдсон командлагч Сергей Суровикин Херсон дахь нөхцөл байдлын талаар хэлэхдээ: "Херсоны оршин суугчдын хувьд аюултай нөхцөл байдал үүссэн. Антоновскийн гүүр, Каховская усан цахилгаан станцын далан пуужинд өртөж эвдэрсэн, хөдөлгөөн зогссон, хоол хүнс хүргэх болон ус, цахилгааны асуудал хүндрэлтэй болсон гэжээ.
Түүнчлэн засаг захиргааны тэргүүн Володимир Салдо "Бид энгийн иргэдийг хамгаалах ёстой. Херсоныг хэнд ч өгөхгүй, цэргийнхэн юу хийхээ мэдэж байгаа. Тактикийн нөхцөл байдлыг харгалзан шаардлагатай бол сөрөг довтолгоонд орно" гэж "Россия-24" телевизийн эфирээр ярьжээ.
Эх сурвалж: ВВС
