Өвөрмонголчуудын яриа хэллэгийг дооглодогт сэтгэл эмзэглэж явдгаа нэгэн бүсгүй илэрхийлж, дүрс бичлэгээ твиттер хуудаснаа оруулжээ. Хошин урлагийн төлөөлөл бол МУГЖ Н.Онон, МУГЖ Н.Ариунболд нар энэхүү асуудалд ихэд эмзэглэж буйгаа илэрхийлж, уг сэдвийн хүрээнд үзэл бодлоо илэрхийлсэн ХЗДХЯ-ны Төрийн нарийн бичгийн дарга П.Сайнзоригийг албан ёсоор уучлалт гуйхыг шаардсан билээ.
Энэхүү үйл явдлын дараа цахим орчинд хүн бүр үзэл бодлоо янз бүрээр илэрхийлж байна. Тэдний нэг нь Өвөр Монголоос манай улсад ажиллаж амьдарч буй иргэн З.Сүхээ юм. Тэрбээр өөрийн цахим хуудастдаа дараах байр суурийг илэрхийллээ.
-Би бол Өвөр Монголын энгийн нэгэн эмч. Эмч хүн хүний бие махбодыг эмчилдэг бол уран бүтээлчид хүний оюун санааг эмчилдэг гэж боддог. Ардчилал бадарсан Монгол улсад адилхан эмч мэргэжилтэн гэж үздэг хошин шогийнхонд хандаж хэдэн үг хэлье.
M.Баярмагнай тэргүүтэй Монгол шогчид оо, та нараас би хэдэн зүйл асууя?
“Эмэгтэйчүүдийн салтаа байцаах газар” гэсэн үүдний хаягийг Өвөр Монголын аль эмнэлэгт үзэв ээ? Өвөр Монголд
үүдний хаягийг тусгай хянах албан газраас хянаад стандартын дагуу Монгол бичгийг дээд талд нь, Хятад бичгийг доод талд нь бичиж хаддаг хуультай.
Монгол уламжлалт эмнэлэгт анагаах ухааны есөн мод гэж бий. Энэ есөн модноос 47 салаа гарч 224 навч, хоёр цэцэг, гурван үр ургаснаар зүйрлэж, хэдэн зуун жилийн турш манай дээдэс Монгол анагаах ухааныг эрүүл бие оношлох ухаан эмчлэх аргатай нь есөн модоор төлөөлж ирсэн билээ. |
Иймээс Өвөр Монголд эмнэлэгээ нэг мод гэж үзээд доторх тасгуудыг "салаа" гэж нэрлэдэг юм. Жишээ нь: Таван эрхтний салаа, эмэгтэйчүүдийн салаа, хүүхдийн салаа гэх мэт. Хэрвээ та нар нүдээрээ үзсэн бол "салаа" гэсэн монгол үсгийг "салтаа" гэж буруу уншсан байна.
Мөн “Мөсөн мөлжүүр гэнэ” гэдэг чинь мөсийг яс мөлжихтэй адил мөлжихийг хэлж байгаа зүйл биш. “Мөсмөлж” гэсэн үг.
Мөс арай болоогүй байгаа үеийг хэлдэг. Харин зайрмаг нь усны дээгүүр өрөм шиг юм тогтож зайр суухыг хэлдэг юм биш үү… Тиймээс зайрмаг гэдэг үг чинь гадуураа мөсөөр хучигдсан дотроо шингэнтэй юм уу эсхүл дээгүүрээ өрөм сууж хөлдсөн усыг хэлэх юм шиг санагдана.
Бас бялууг Өвөр Монголчууд "Насан баярын боов" гэдэг гээд их инээлдэх юм. Өвөр Монголд бялууг "зөөхийтэй боов" гэдэг юм.
Монгол Улс халх ястнаар голлосон тул зарим газрын хүмүүс Монгол улсыг "Халх улс" гэдэг. Халх Монгол ах дүү нар аа та нар дэлхийн Монголчуудын дуурайлал байх ёстой. Та нар бол Монголчуудын голомтон дээр байгаа хүмүүс.
Одоо цагт дэлхийд тархсан монголчууд нэг нэгнээсээ үгүй дутуугаа нөхөж, эв дүнжинтэй байх нь чухал.
Өвөр Монголоос ирсэн эмч З. Сүхээ гэжээ
