Хууль зүйн яамны сайд Х.Нямбаатар зам тээврийн осол буурахгүй байгаа шалтгаан нөхцөл, холбогдох хууль тогтоолын талаар мэдээлэл өглөө.
Тэрбээр “Зөрчлийн тухай хуулийн шинэчилсэн найруулгын төслийг Засгийн газар, Их хуралд өргөн барьчихсан байгаа. Их хурал хэлэлцэх эсэхээ шийдчихсэн. Зөрчлийн тухай хуулийн шинэчилсэн найруулга, түүнийг хэрэгжүүлдэг зөрчил шалган шийдвэрлэх тухай хуулийн шинэчилсэн найруулгын төсөл, эрүүгийн хуулийн нэмэлт өөрчлөлт эрүүгийн хэрэг хянан шийдвэрлэх тухай хуулийн нэмэлт өөрчлөлт гэсэн 4 хуулийг хамтад нь хэлэлцүүлэх зүй тогтолтой. Өнгөрсөн хавар энэ 4 хуулийн цогцоор нь шийдвэрлэх гэтэл УИХ-ын чуулганы нэгдсэн хуралдаан дээр хэлэлцэх шаардлагагүй гээд унагаасан. Тэгэхээр энэ жил дахиад гишүүдийн тавьсан шаардлагуудыг тусгаад дахин өргөн барьсан.
Согтуугаар тээврийн хэрэгсэл жолоодож байгаа зөрчил яагаад буурахгүй байна вэ гэвэл нэгдүгээрт, цагдаагийн ерөнхий газрын ажилчдын илрүүлэлт өндөр байгаа. Та бүхэн мэдэж байгаа өглөө орой хотхоноос гарахад бүгдэнд нь үлээлгэх шалгалт хийгдэж байгаа. Өнөөдөр замын хөдөлгөөнд 500-600 мянган тээврийн хэрэгсэл оролцож байна. Цаашид 2023 онд нийслэлтэй хамтраад шинэ технологийг нэмэгдүүлэхээр ажиллаж байгаа. Энэ нь автомашины хөдөлгөөн зохицуулалтыг хиймэл оюун ухаанаар зохицуулах боломжтой болно гэсэн үг. Хоёрдугаарт татвар, даатгал, торгууль төлөөгүй тээврийн хэрэгслийг хөдөлгөөнд оролцоход нь шахаж шаардаж өгье гэж төлөвлөөд байна” гэж ярив.
Г.Бүжинлхам
