Хууль зүйн байнгын хорооны хурал өнөөдөр боллоо. Хуралдаанаар Гэмт хэрэг зөрчлөөс урьдчилан сэргийлэх тухай хуульд өөрчлөлт оруулах тухай асуудлыг хэлэлцлээ. Уг хуулийн төслийг үзэл баримтлалын хүрээнд дэмжиж чуулганы нэгдсэн хуралдаанаар хэлэлцүүлэх нь зүйтэй гэсэн асуудалд санал хураалт явуулахад нийт гишүүдийн 63,6 хувь нь дэмжлээ. Харин нэр бүхий 4 гишүүн татгалзсан хариу ирүүлжээ. Энэ үеэр УИХ-ын гишүүн Б.Энхбаяр гэмт хэрэг зөрчлөөс урьдчилан сэргийлэх тухай хуульд өөрчлөлт оруулах тухай хуулийн төслийг дэмжихгүй байгаагаа хэллээ.
Тэрбээр “Хүнийг үзэл бодлоо илэрхийлснийх нь төлөө шийтгэнэ гэж хуульд заагаагүй байхад 300 гаруй хүнийг шийтгэсэн бол энэ хууль тогтоогчийн бодлого биш. Шийтгүүлсэн иргэдийг УИХ цагаатгах ёстой. Тийм хууль санаачилбал би нэгдье. Хууль санаачлагч ерөөсөө ийм асуудлыг зөрчлөөр шийтгэе гэсэн хууль гаргаагүй. Одоо өргөн барьсан хуулийн төслийг дэмжье гэхээр болохгүй байна. Яагаад гэвэл хүн үзэл бодлоо илэрхийлэхдээ бусдын нэр төрд хүндэтгэлтэй хандах үүрэгтэй гэдэг заалтыг авч хаях гээд байна. Авчихаар үүрэггүй болчхоод байна. Эсрэгээрээ хэнийг л бол хэнийг доромжилж болно гэдэг утгатай хууль болчих гээд байна. Бид энэ хуулийг дэмжье гэхээр үндсэн хуулиа зөрчих гээд байна. Үндсэн хуульд бидний үндсэн үүрэг байгаа. Монгол Улсын иргэн бүрийн үүрэг буюу Нэгдүгээрт, Монгол Улсын үндсэн хууль болон бусад хууль тогтоомжийг хүндэтгэн дээдлэх сахин биелүүлэх, хоёрдугаарт, бусдын нэр төр алдар хүнд ажлын нэр хүндийг хүндэтгэх. Энэ үндсэн үүргийг нь гэмт хэргээс урьдчилан сэргийлэх тухай хуулиас авах тухай санал гаргачхаад байна. Тэгэхээр би үндсэн хуулийнхаа эсрэг кноп дарж чадахгүй. Тиймээс дэмжихгүй” гэв.
Г.Бүжинлхам
