Намрын ээлжит чуулганы хуралдаан эхэлж гишүүд 2023 оны төсвийг хэлэлцэж байгаа чухал үе болж байна. Ирэх жилийн төсвийг батлах эцсийн хугацаа 11 дүгээр сарын 15-ний өдөр. Гэтэл төсөв батлахад нөлөө бүхий засгийн газрын гишүүд ажлаа хийхгүй айлчлал нэртэй зугаалаад явж байгаа нь шүүмжлэл дагуулаад байна.
Тухайлбал, Ерөнхий сайд Л.Оюун-Эрдэнэ УИХ-ын гишүүн Ц.Мөнхцэцэг, Зам, тээврийн хөгжлийн сайд Б.Бямбацогт, Эдийн засгийн хөгжлийн сайд Ч.Хүрэлбаатар нарын хамтаар Герман улсад айлчлал хийгээд, өнгөрөгч Ням гарагт эх орондоо ирсэн. Харин УИХ-ын дарга Г.Занданшатар Монгол-Туркийн парламентын танхимын бүлгийн дарга Т.Аюурсайханыг дагуулж яваагүй хэр нь нэр бүхий бусад гишүүдийн хамт Турк улсад үр дүн муутай айлчлал АЯЛАЛ хийгээд иржээ. 2023 оны төсвийг хэлэхэд Мөн Сангийн сайд Б.Жавхлан, Монголбанкны Ерөнхийлөгч Б.Лхагвасүрэн нар АНУ-д явна гэх мэдээлэл ч байна.
Цаашид улс орны нийгэм, эдийн засгийн байдал ямар байдалд байх нь одоо батлах төсөвтэй шууд хамаатай. Гэтэл энэ мэт олон аяллын дараа ямар үр дүн тооцооллоор төсөв хэлэлцэж батлах вэ гэдэг иргэдийн анхаарлыг татаж байгаа нь тодорхой.
Харин айлчлалд яваагүй гишүүдийн хувьд төсвөө хэлэлцэж байгаа ч тодорхой үр дүнд хүрэхгүй байсаар байна. . Ковидын дараа унасан эдийн засаг бага багаар сэргэж байгаа гэж ярих боловч бодит байдал дээр төгрөгийн ханш өдрөөс өдөрт унаж, бараа бүтээгдэхүүний үнэ хурдан хугацаанд нэмэгдэж байна. Иргэдийн авдаг цалин өрөө дарах байтугай хэрэгцээгээ хангахад ч хэцүү болсон.
Эдийн засагчид 2023 он гарснаас хойш манай улсын эдийн засаг одоо байгаагаас хэд дахин хэцүү болно гэж харж байгаа. Энэ үед улс төрчдийн гаргах шийдвэр, батлах төсөв хамгийн чухал асуудал болоод байгаа. Гэвч төсөв батлахад оролцох нөлөө бүхий эрхмүүдийг айлчлал нэртэй зугаалж байгааг гайхаж байна.
Г.Бүжинлхам
