Энэ сарын 10-ны өдөр Toyota Landcruiser-200 маркийн машин замын эсрэг урсгалд орж нийт 7 автомашиныг мөргөж, замаас гарч явган хүний замаар явж байсан явган зорчигч 12 настай “С”, 12 настай эмэгтэй “Э” нарыг мөргөж эрүүл мэндэд нь хохирол учруулсан хэрэг болсон билээ.
Тодруулбал, тус авто осол Баянзүрх дүүргийн Олимп хотхоны хойд замд болж, цагдаагийн байгууллагад ирсэн дуудлага мэдээллийн дагуу Тээврийн цагдаагийн албаны жижүүрийн бүрэлдэхүүн хэргийн газрыг хамгаалалтад авч, үзлэг шалгалтыг хийхэд тухайн осол, хэргийг үйлдсэн жолооч 1993 онд төрсөн, эмэгтэй “М” нь найз залуу болох “Б”-г согтуугаар автомашин жолоодуулахгүй байх зорилгоор түүний төрсөн ахын эзэмшлийн Toyota Land Cruiser маркийн тээврийн хэрэгслийг жолоодож явахдаа дээрх ослыг гаргасан нь тогтоогджээ.
Жолооч “М” нь тээврийн хэрэгсэл жолоодох эрхийн үнэмлэхгүй байсан. Мөн осол хэрэг үйлдэх үедээ согтууруулах ундааны зүйл хэрэглээгүй драйгер багаж үлээлгэж шалгахад 0,00 хувьтай гарсан бөгөөд мансууруулах эм, сэтгэцэд нөлөөт бодис хэрэглэсэн эсэхийг урьдчилсан байдлаар тогтоох зорилгоор түүний шээсэнд тусгай зориулалтын тест тавин шалгахад ямар нэгэн мансууруулах эм, сэтгэцэд нөлөөт бодис илрээгүй байна. Түүнчлэн шинжилгээг нарийвчлан тогтоохоор түүний биеэс биологийн дээж болгон цус авч Шүүхийн шинжилгээний хүрээлэнд шинжээч томилжээ.
Харин явган зорчигч “С”-ын эрүүл мэндэд учирсан хохирлыг тогтоохоор шинжээч томилсон боловч дүгнэлт гараагүй, уг хэргийг ТЦА-аас ослын шалтгаан нөхцлийг тогтоохоор мөрдөн шалгах ажиллагааг үргэлжлүүлэн явуулж байгаа талаар албаны эх сурвалж мэдээлэв.
Дээрх хэрэгтэй холбогдуулж цахим орчинд зам тээврийн осол гаргасан жолоочийг ХЗДХ-ийн сайд Х.Нямбаатар болон Дотоодын цэргийн штабын дарга, хурандаа Р.Чингисийн охин, тэдгээрийн хамаарал бүхий этгээд гэх мэдээлэл цацагдсан.
Тэгвэл энэ талаар холбогдох албаныханаас тодруулахад уг мэдээлэл буруу ташаа мэдээлэл гэдгийг хэллээ.
Мөн холбогдогч этгээд нь тухайн албан тушаалтнуудтай ямар нэгэн хамааралгүй бөгөөд хэрэг хянан шийдвэрлэх ажиллагаа ямар нэгэн олны танил болон төрийн өндөр дээд албан тушаалтантай хамаарал бүхий этгээд байсан ч мөрдөн шалгах ажиллагаа хуулийн дагуу явагддаг гэв.
Эх сурвалж: Arslan.mn
