Түүхэнд сансрын анхны жуулчин болсон Америкийн бизнес эрхлэгч 82 настай Денис Тито сансарт дахин нисэхээр бэлтгэж байна. Харин энэ удаа тэрбээр эхнэр Акикогийн хамт нисэхээр төлөвлөж байгаа нь тодорхой болов.
Ингэхдээ Денис, Акико Тито нар удахгүй сарыг тойрон ниснэ гэдгийг Илон Маскийн "SpaceX" компани албан ёсоор баталлаа. Нислэгийн товыг хараахан зарлаагүй байна.
Денис Тито сансарт аялсан дэлхийн анхны хүн болсон бөгөөд тэрээр 2001 онд ОХУ-ын "Союз" хөлгөөр нисч Олон улсын сансрын тойрог замын станцад бараг 8 хоног ажилласан юм.
Түүний дараагийн эхнэртэйгээ хамт хийх нислэг сарыг тойрон нисч, хамгийн ихдээ саранд 200 километрийн зайд ойртох боловч тэнд буух төлөвлөгөөгүй байна. Энэ бүхэнтэй холбоотойгоо Акико, Денис Тито нарыг ирээдүйн оддын аялалын анхны багийн гишүүд гэж зарлав.
Илан Маск ирээдүйд ийм сансрын хөлөг онгоцоор сар руу, дараа нь Ангараг руу хүн, ачаа хүргэхээр төлөвлөж байна. Тэрээр мөн энэ төслийн хүрээнд ирэх сард нисгэгчгүй сансрын тээвэрлэгч хөлгийг сар руу илгээнэ гэдгээ хэдийнэ мэдэгдсэн юм.
Титогийн эхнэртэйгээ хийх сансрын шинэ аялал ямар үнэтэй болохыг хараахан мэдээлээгүй байна. Харин тодорхой байгаа нэг зүйл бол бизнесмэн сансрын анхны аялалдаа 20 гаруй сая доллар зарцуулсан юм. Тито 2001 онд дэлхийд буцаж ирсэнийхээ дараа энэхүү нислэгээ "амьдралынхаа хамгийн агуу үйл явдал байсан" гэж хэлж байв.
"Би мөрөөдлөө биелүүлсэн, үүнээс илүү сайн зүйл байхгүй" гээд "Хэрвээ боломжтой байсан бол би сансрын станцад дахиад хэдэн сар байх байлаа" гэжээ.
Эх сурвалж: Vesty.co.il/
