УИХ-ын чуулганы нэгдсэн хуралдаанаар Монгол Улсын нэгдсэн төсвийн 2023 оны төсвийн хүрээний мэдэгдлийг хэлэлцэж байна.
Чуулганы үеэр УИХ-ын гишүүн С.Одонтуяа “Хүүхдийн мөнгийг 9 хувь хэмнэхээр хэдий хэр хэмжээний мөнгө хэмнэх гээд байгаа юм. Ер нь хүүхдийн мөнгөнөөс болоод эдийн засаг хямраад байгаа юм байхгүй. Баялагаасаа хүүхдэдээ хүртээе гэсэн зорилгоор энэ мөнгө анх санаачлагдсан. Ер нь Монгол Улс авлигач хулгайчдаасаа болоод л ядуураад байгаа шүү дээ. Бидний байнга жишээ авдаг орнууд байна. УИХ-ын гишүүд туршлага судална гээл ичих ч үгүй өчнөөн олуулаа байнга явдаг. Норвег, Австрали гэх мэт орнууд руу. Яаж энэ баялгаа иргэддээ түгээдэг юм бэ гээд зөндөө судаллаа. Энэ зүйлийн үндсэн дээр хүүхдүүдээ мөнгө өгдөг. Энэ бол халамжийн мөнгө биш. Энэ чинь баялагтай орнууд баялгаасаа иргэдээ өгч байгаа мөнгөний хэлбэр. Хүүхдүүддээ мөнгө өгдөг гэр бүлийг дэмждэг бидний байнга жишээ авах дуртай газрууд чинь төрөөс нь тэрбумтнууд төрдөггүй. Аль болохоор байгаа бүх юмаа хүүхдэдээ, гэр бүлүүддээ өгөхийг хичээдэг бодлоготой улс орнууд. Нүүрсний хулгайчдын орлого хэдэн зуун тэрбумд хүрсэн гээд ичихгүй чуулган дээрээ та нар ил хэрэлдэж л байдаг. Тэгэхээр энэ 9 хувийг хэмнэснээрээ юу хэмнэх гээд байгаа юм бэ. Сонгуулиас санал авах гээд тараасан хавтгайрсан халамжаас л энэ улс орон сүйрч байгаа. Хүүхдийн мөнгөнөөс болоод байгаа юм байхгүй” хэмээн хэллээ.
Г.Бүжинлхам
