УИХ-ын чуулганы нэгдсэн хуралдаан эхэллээ. Хуралдаанаар Монгол Улсын нэгдсэн төсвийн 2023 оны төсвийн хүрээний мэдэгдлийг хэлэлцэж байна.
УИХ-ын гишүүн Ж.Батжаргал:
Төсвийн хүрээний мэдэгдэл төсвийн төсөөллийг бид баталчихсан. Одоо 2023 оны төсөл боловсруулж байгаатай холбогдуулж өөрчлөлт оруулах гэж байна. Улсын чинь Засгийн Газрын өр өнөөдөр яг хэд байгаа юм бэ? Дээд хэмжээ нь 65 хувь байж болох юм гэсэн хуулийн заалтаар тоо тавьчхаад ард түмнийг гишүүдийг төөрөгдүүлээд байдгаа больчихмоор байна. Хоёрдугаарт, Халамжийн зардал 1,5 орчим их наядаар өссөн байна. Бид халамжаас хөдөлмөрт гээд яриад байдаг. Тэгсэн хэр нь халамжийн зардал нийт 1,5 их наядаар өссөн байдаг. Ийм байж болохгүй. Хөрөнгийн зардлын төсөөлөл яагаад өссөн бэ?
Сангийн яамны Төсвийн бодлого, төлөвлөлтийн газрын дарга Ж.Ганбат:
Засгийн газрын өр яг одоогийн байдлаар 28,5 их наяд байна. Халамжийн хувьд бол нийтдээ бид нар 2 их наядын халамжийн зардал байна. Үүний 1,4 их наяд нь хүүхдийн мөнгө байна. Бид 2022 оны хувьд хүүхдийн мөнгийг Ирээдүйн өв сангаас санхүүжүүлэхээр УИХ-аар баталсан байсан. Энийг бид 2023 онд улсын төсвөөс санхүүжүүлэхээр оруулж ирсэнтэй холбоотойгоор халамжийн зардал 2 их наяд болсон. Хөрөнгө оруулалтын хувьд бол дүн нэмэгдсэн шалтгаан нь хөрөнгийн зардал дээр нийслэлийн түгжрэлийг бууруулахтай холбоотой 339 тэрбум төгрөг, барилгын бараа материалын үнийн өсөлттэй холбоотойгоор 300 тэрбум төгрөг, гадаад зээл тусламжийн Монголын талын санхүүжилт дээр 232 тэрбум төгрөгөөр нэмэгдсэн.
Г.Бүжинлхам
