ОХУ-ын Гадаад хэргийн сайд Сергей Лавров даваа гаригт төрлийн мэдлийн “Россия-24” телевизэд ярилцлага өгөх үеэрээ дэлхийн хэмжээнд цөмийн дайн дэгдэж болзошгүй эрсдэлийг анхааруулсан билээ.
С.Лавров Украины асуудлаас үүдэлтэй нөхцөл байдлыг 1962 оны Кубын хямралтай жишиж, цөмийн дайн гарах эрсдэл бодитой бөгөөд өндөр байгааг анхааруулсан юм. Мөн НАТО-гийн гишүүн орнууд Украинд зэвсэг нийлүүлж байгаа нь барууны холбоотнууд ОХУ-тай шууд бус байдлаар прокси дайн хийж байгаа хэлбэр гэж тодорхойлсон ба "Москва цөмийн дайн гарах эрсдэлийг зохиомлоор нэмэгдүүлэхийг хүсэхгүй байгаа. Цөмийн дайны аюулыг дутуугаар үнэлж болохгүй" гэх байр суурь илэрхийлсэн юм.
Тэгвэл Украины Гадаад хэргийн сайд Дмитрий Кулеба Кремлийн энэхүү байр суурийг “Дайнд ялагдаж эхэлсний шинж” гэж тодорхойлжээ. Тэрээр өөрийн албан ёсны твиттер хаягаар дамжуулан энэ талаар “Москва дэлхийн III дайн, цөмийн дайны бодит аюулын тухай ярьж эхэллээ. Энэ бол ердөө Москва Украин дахь ялагдлаа мэдэрч байгаагийн шинж” гэжээ. Мөн тэрээр дэлхийн улс орнуудад хандан зөвхөн Европ тив төдийгүй дэлхийн аюулгүй байдлыг хамгаалахын тулд Украинд одоогийнхоосоо хоёр дахин их дэмжлэг үзүүлэхийг уриалсан байна.
