
Эрчим хүчний салбарт дорвитой шийдвэр гаргахгүй бол бодит нөхцөл байдлаар энэ өвлийг зайлшгүй хүндрэлтэй даван туулна гэдэг мэдээллийг албаны хүмүүс, судлаачид өгсөөр буй.Тулгамдаж буй асуудлуудын жагсаалтад эрчим хүчний үнэ, тариф багтдаг. Үнийг нэмж байж шаардлагатай засвар шинэчлэлийг хийх, цаашид зөв голдиролд нь оруулах боломжтой гэдэг.Тэгвэл Эрчим хүчний сайд асан Н.Тавинбэх энэ хүрээнд дэлгэрэнгүй тайлан, мэдээллийг УИХ-ын Аюулгүй байдал, гадаад бодлогын байнгын хорооны хуралдааны үеэр өгсөн. Шинэ сайд Б.Чойжилсүрэн энэ асуудлаар тодорхой тоон болон нөхцөл байдлын мэдээлэл өгөөгүй байгаа юм.Н.Тавинбэх сайдын үеийн мэдээллээр, эрчим хүчний салбар нь:
- 2019 онд 59 тэрбум
- 2020 онд 92 тэрбум
- 2021 онд 78 тэрбум
- 2022 онд урьдчилсан тооцооллоор 168.2 тэрбум төгрөгийн алдагдалтай ажиллана. Иймд цахилгааны дундаж үнийг 28-30 хувиар нэмэх шаардлагатай байгаа. Одоогоор айл өрхөд борлуулах цахилгааны тариф:
- Энгийн тоолууртайд 110.49 төгрөг /Сарын нийт хэрэглээ нь 150 кВт.ц хүртэлх/ ба 130.29 төгрөг /Сарын нийт хэрэглээ нь 151 кВ.ц ба түүнээс дээш/
- Хоёр тоолууртайд өдрийн хэрэглээнд 116.39 төгрөг, орой-шөнийн хэрэглээнд 89.19 төгрөг байна.
Эдгээр нь харгалзан:
- Энгийн тоолууртайд 143.637 ба 169.377
- Хоёр тоолууртайд 151.307 ба 115.947 төгрөг болж нэмэгдэхээр байгаа юм.