“Чингис хааны музей“ маргааш нээлтээ хийхтэй холбогдуулан албаныхан мэдээлэл хийлээ. Энэ үеэр төрийн есөн хөлт цагаан тугийг Төрийн ордноос гаргаж Чингис хаан музейд залах болсон талаар ЕТГ-ын дарга Я.Содбаатар мэдээллээ.
Тэрбээр "2019 долдугаар сарын 03-ний өдөр Чингис хааны музейг барьж байгуулах шийдвэр гарсан. Чингис хаан музейг маргааш морин цагт нээхээр төлөвлөж байна. Чингис хаан түүний залгамжлагч нар болон Монголын хаад язгууртны түүхийг үзүүлсэн музейтэй байх нь түүх соёлоо сурталчлах, аялал жуулчлалыг татах чиглэлд хийж буй томоохон арга хэмжээ гэж бид харж байна. Маргаашийн нээлтийн ёслолын үеэр төрийн есөн хөлт цагаан тугийг зална. Тусгайлан зарлиг гаргаж есөн хөлт цагаан тугийг төрийн ордноос гаргаж шинэ музейд залах юм” гэв.
Мөн Соёлын дэд сайд М.Батбаяр “Музей бол аливаа улс үндэстнүүдийн Ард түмний түүх өв соёл, өв уламжлалыг хадгалж хамгаалах, бүртгэн баримтжуулах, судалж сурталчлах зориулалтаар өндөр ач холбогдол өгч бариулдаг. Мөн сан хөмрөгийн бүрдүүлэлтийн бодлого, хадгалалт хамгаалалтын олон улсын стандарт үйл ажиллагааны чиглэл зэргийг төрийн онцгой анхаарал дунд бий болдог. Хүний хөгжлийн цогц орон зайг бүрдүүлдэг учиртай юм. 2020 дөрөвдүгээр сард шав тавьж бүтээн байгуулалт эхэлсэн. Барилга барих явц цар тахлын хүнд нөхцөлд байсан ч 1,6 жилийн хугацаанд барьж дуусган байнгын ашиглалтад хүлээж авсан. Түүнээс хойш үзүүлэн биелэлтийн ажил өрнөж өнөөдөр үйл ажиллагаагаа нээхэд бэлэн болсон байна. Энэ барилгын хувьд улсын төв цэгт байрлалтай нийт 20500 м.кв талбайтай 9 давхар музейн зориулалттай барилга юм. Мөн музей нь боловсролын орон зай, бүх насныханд зориулсан олон талд арга хэмжээ зохион байгуулах орон зайтай гэдгээрээ онцлог. Музейн салбарын хөгжил нийт 100 гаруй жилийн түүхтэй хэдий ч дэлхийн стандартад нийцсэн музейг бид барьж байгуулж амжаагүй байсан. Тэгвэл өнөөдөр ийм боломж бидний өмнө нээгдэж байна. Энэ барилгын нийт талбайн 40 хувийг үзүүлгийн талбай эзэлнэ. Энэ барилга бол барилгын менежментийн тоноглолоор тоноглогдсон. Яагаад гэвэл сан хөмрөг гэдэг бол асар их дурсгалыг хадгалж, хамгаалж байдаг. Тухайлбал, гал унтраах систем гэхэд үзүүлэнгийн танхим болон бусад танхимд бороожуулах систем ашигласан бол сан хөмрөгийн танхимд агаарыг вакумжуулах замаар үзвэр эдлэлд ямар нэгэн гадны нөлөө үзүүлэхгүй байх нөхцөлийг бүрдүүлсэн. Энэ барилгыг манай үндэсний мэргэжилтнүүд хийж дуусгаж байна. Хамгийн дээд талд эх эзэн Чингис хааны хүндэтгэлийн танхим. Цаашдаа 7 метрийн өндөр бүхий Чингис хааны алтадмал баримал бий болно. Үүнээс гадна энэ барилгыг урлагийн бүтээлээр тоноглосон. Ер нь 1950 аад оноос хойш Сүхбаатарын талбайг тойрсон барилгуудыг аль болох үндэсний хээ хуараар чимэглэх болсон. Тэгвэл сүүлийн 30 жил уран бүтээлчдийг уран барилгын чимэглэлд оролцуулан нийтдээ 200 гаруй уран бүтээлчид 5 багц ажлыг хийсэн. Мөн Монгол угсаатны 700 гаруй тамгыг барилгын 2 талд байрлуулсан. Монголчуудын түүх өв соёлыг уран барилгад шингээсэн бүтээл юм” гэж мэдээлэл хийх үеэрээ хэллээ.
Г.Бүжинлхам
